టీచర్ల బదిలీలకు హైకోర్టు గ్రీన్ సిగ్నల్

హైదరాబాద్: ఉపాధ్యాయుల బదిలీలకు, పదోన్నతులకు ఆటంకాలు తొలగిపోయాయి. బదిలీలకు, ప్రమోషన్లకు సంబంధించిన కౌన్సెలింగును నిలిపేస్తూ ట్రిబ్యునల్ ఇచ్చిన మధ్యంతర ఉత్తర్వులను రాష్ట్ర హైకోర్టు మంగళవారం కొట్టేసింది. కౌన్సెలింగును యధావిధిగా కొనసాగించవచ్చునని హైకోర్టు తెలిపింది. ట్రిబ్యునల్ ఉత్తర్వులపై ఇరు పక్షాలు వాదనలు విన్న హైకోర్టు ట్రిబ్యునల్ ఆదేశాలను కొట్టేసింది. హైకోర్టు ఆదేశాలపై ఉపాధ్యాయ సంఘాలు హర్షం వ్యక్తం చేశాయి.

బదిలీల కౌన్సెలింగ్ లో తమకు కూడా అవకాశం కల్పించాలని కోరుతూ 610 జీవో ద్వారా బదిలీ అయిన ఉపాధ్యాయులు ట్రిబ్యునల్ ను ఆశ్రయించారు. దీనికి ప్రభుత్వం నిరాకరించడంతో కౌన్సెలింగును నిలిపేస్తూ ట్రిబ్యునల్ మధ్యంతర ఉత్తర్వులు జారీ చేసింది. ట్రిబ్యునల్ ఉత్తర్వులను సవాల్ చేస్తూ ప్రభుత్వం హైకోర్టుకు వెళ్లింది. హైకోర్టు ఆదేశాలను సవాల్ చేస్తూ పిటిషనర్లు సుప్రీంకోర్టును ఆశ్రయించే అవకాశం ఉంది.