ఉస్మానియాలో మురళీనాథ్ మృతదేహం

హైదరాబాద్: ఢిల్లీలో అనుమానాస్పద స్థితిలో మరణించిన సాయుధ పోలీసు కానిస్టేబుల్ మురళీనాథ్ మృతదేహం హైదరాబాదుకు చేరుకుంది. మంగళవారం తెల్లవారుజామున ఆయన మృతదేహాన్ని ఉస్మానియా ఆస్పత్రికి తరలించారు. ఉస్మానియాలో ఆయన మృతదేహానికి పోస్టు మార్టం నిర్వహిస్తారు. కాగా, మురళీనాథ్ మృతదేహం తరలింపునకు సంబంధించిన సమాచారం కూడా తమకు అందించకపోవడం పట్ల కుటుంబ సభ్యులు అనుమానాలు వ్యక్తం చేస్తున్నారు.

మురళీనాథ్ తనకు గత నెల 28వ తేదీన ఫోన్ చేశాడని, తనను తీవ్రంగా వేధిస్తున్నారని, ఈ విషయాన్ని శాసనసభలో లేవనెత్తేలా మీడియా దృష్టికి తీసుకుని వెళ్లాల్సిందిగా చెప్పాడని ఆయన భార్య కవిత చెబుతోంది. నోయిడాకు వెళ్లే ముందు తనకు ఫోన్ చేసినట్లు ఆమె చెబుతోంది. ఈలోగానే అతను మరణించాడని ఆమె అంటోంది. నిజానికి అది మురళీనాథ్ శవమేనా అనే అనుమానం కూడా వ్యక్తమవుతోంది. వైద్య నిపుణుల కమిటీ పర్యవేక్షణలో రీపోస్టుమార్టం జరగాలనే డిమాండ్ కూడా వినిపిస్తోంది.

మురళీనాథ్ కుటుంబ సభ్యులకు న్యాయం జరిగేలా చూస్తామని ఎల్బీ నగర్ శాసనసభ్యుడు సుధీర్ రెడ్డి హామీ ఇచ్చారు. మురళీనాథ్ మృతదేహం మంగళవారం తెల్లవారు జామున మూడు గంటలకే వచ్చినట్లు తమకు తెలిసిందని, అయితే కుటుంబ సభ్యులను డిస్టర్బ్ చేయడం ఇష్టం లేక చెప్పలేదని ఆయన అంటున్నారు. పొంతన లేని ప్రకటనలు, హామీలు మురళీనాథ్ కుటుంబ సభ్యుల్లో మరిన్ని అనుమానాలకు తావిస్తోంది.