రౌడీనైతే ఆమోదించండి: ఎర్రబెల్లి

హైదరాబాద్: తాను రౌడీనని తేలితే తన రాజీనామాను ఆమోదించాలని శాసనసభ నుంచి రెండు రోజులు పాటు సస్పెండ్ అయిన ఎర్రబెల్లి దయాకర రావు స్పీకర్ కిరణ్ కుమార్ రెడ్డిని కోరారు. సభ నుంచి సస్పెండ్ అయిన తర్వాత ఆయన గన్ పార్కు వద్ద బుధవారం మీడియా ప్రతినిధులతో మాట్లాడారు. ప్రజా సమస్యలపై చేసిన ఆందోళనలకు సంబంధించిన కేసులు తప్ప తనపై ఇతర వ్యక్తిగతమైన కేసులు పోలీసు స్టేషన్లలో లేవని ఆయన చెప్పారు. శాసనసభలో రౌడీలు ఉండకూడదనేది తన ఉద్దేశమని, కేసులు ఉన్న ఇతరులు కూడా శాసనసభలో ఉండకూడదని ఆయన అన్నారు.

చేనేత కార్మికులపై చర్చ సందర్భంగా ముఖ్యమంత్రి పరిష్కారమేదైనా చెపుతారేమోనని అనుకున్నానని, అయితే ముఖ్యమంత్రి ఎదురు దాడికి దిగారని ఆయన అన్నారు. తాను విషయం తప్ప మరేదీ మాట్లాడలేదని ఆయన అన్నారు. అంశంపై ఏదో ఒకటి మాట్లాడడం పరిపాటేనని ఆయన చెప్పారు. ఈ రోజు కన్నా తీవ్రంగా గతంలో కూడా తాము మాట్లాడామని ఆయన చెప్పారు. ఆర్థిక మంత్రి కె. రోశయ్య తన మాటలను వక్రీకరించారని ఆయన అన్నారు. రా, బయటకు రా, చూసుకుందామని తాను అన్నట్లు ముఖ్యమంత్రి చెబుతున్నారని, తాను అలా అనలేదని ఆయన అన్నారు.

తాను ముఖ్యమంత్రి నుంచి క్షమాపణ కోరడం లేదని, ముఖ్యమంత్రిగా హుందాగా వ్యవహరిస్తే చాలునని ఆయన అన్నారు. తన జీవితంలో ఇటువంటి సంఘటన ఏ రోజు కూడా జరగలేదని ఆయన అన్నారు.