కంట తడి పెట్టిన సోనియా

న్యూఢిల్లీ: రాష్ట్ర ముఖ్యమంత్రి డాక్టర్ వైయస్ రాజశేఖర రెడ్డి మృతికి కాంగ్రెసు అధ్యక్షురాలు సోనియా గాంధీ కంట తడిపెట్టారు. వైయస్ మృతి తమకు తీరని లోటని ఆమె గురువారం మీడియా ప్రతినిధులతో అన్నారు. రాజశేఖర రెడ్డి క్షేమంగా తిరిగి వస్తాడని అనుకున్నామని, కానీ దుర్వార్త వినాల్సి వచ్చిందని ఆమె అన్నారు. తాము వైయస్ కుటుంబానికి ఎల్లవేళలా మద్దతుగా నిలుస్తామని ఆమె అన్నారు.

రాజకీయ శ్రమజీవిగా వైయస్ ను ఆమె అభివర్ణించారు. ఆయన మృతికి కాంగ్రెసు వర్కింగ్ కమిటీ సంతాపం ప్రకటించినట్లు ఆమె తెలిపారు. వైయస్ మృతి పార్టీకి, దేశానికి, రాష్ట్రానికి తీరని లోటని ఆమె అన్నారు. పేద ప్రజల కోసం నిరంతరం కృషి చేసిన నాయకుడిగా ఆమె వైయస్ ను అభివర్ణించారు. స్పష్టమైన దృక్పథం ఉన్న నాయకుడు వైయస్ అని, చురుకైన నాయకుడని ఆమె అన్నారు. పదేళ్ల తర్వాత కాంగ్రెసును 2004లో కాంగ్రెసును రాష్ట్రంలో అధికారంలోకి తెచ్చారని ఆమె గుర్తు చేసుకున్నారు.