ప్రధానికి అంతా తెలుసు: కెవిపి

హైదరాబాద్: ప్రధాని డాక్టర్ మన్మోహన్ సింగ్ కు అంతా తెలుసునని దివంగత నేత వైయస్ రాజశేఖర రెడ్డి ప్రియమిత్రుడు, రాజ్యసభ సభ్యుడు కెవిపి రామచందర్ రావు అన్నారు. రాష్ట్ర పరిస్థితులను మన్మోహన్ కు వివరించాల్సి బాధ్యత తనపై ఉందని ఆయన అన్నారు. కెవిపి రామచందర్ రావు బుధవారంనాడు ప్రధాని మన్మోహన్ సింగ్ ను కలిసి దాదాపు 20 నిమిషాల పాటు మాట్లాడారు. అనంతరం ఆయన మీడియా ప్రతినిధులతో మాట్లాడారు. ముఖ్యమంత్రి అభ్యర్థిపై నెలకొన్న అనిశ్చిత పరిస్థితిపై పూర్తి స్థాయిలో చర్చించాల్సిన అవసరం ఉందని ప్రధాని తనతో అన్నట్లు ఆయన తెలిపారు. ప్రధాని ముఖ్యంగా వైయస్ రాజశేఖర రెడ్డి కుటుంబ సభ్యుల యోగక్షేమాలు అడిగారని ఆయన అన్నారు.

వైయస్ రాజశేఖర రెడ్డి సతీమణి విజయలక్ష్మి ఆరోగ్యం గురించి ప్రత్యేకంగా అడిగి తెలుసుకున్నారని, తాను వచ్చినప్పుడు ఆమె ఆరోగ్యం సరిగా ఉన్నట్లు కనిపించలేదని, ఇప్పుడెలా ఉన్నారని ప్రధాని అడిగారని ఆయన చెప్పారు. వైయస్ కుటుంబ సభ్యులకు అండగా ఉంటూ ఎప్పటికప్పుడు తగిన సహాయం అందించాల్సిన అవసరం ఉందని మన్మోహన్ తనతో అన్నట్లు తెలిపారు. అనంతరం కెవిపి కేంద్ర ఆర్థిక మంత్రి ప్రణబ్ ముఖర్జీతో భేటీ అయ్యే అవకాశం ఉంది.