ఇంటలిజెన్స్ చీఫ్ మనస్తాపం

హైదరాబాద్: రాష్ట్ర ఇంటలిజెన్స్ చీఫ్ అరవింద రావు తనను ఆ పదవి నుంచి తప్పించాలని ప్రభుత్వాన్ని కోరినట్లు తెలుస్తోంది. ముఖ్యమంత్రి డాక్టర్ వైయస్ రాజశేఖర రెడ్డి హెలికాప్టర్ ప్రమాదం నేపథ్యంలో నిఘా వ్యవస్థపై తీవ్ర విమర్శలు వస్తున్నాయి. ఈ ప్రమాదం విషయంలో నిఘా వైఫల్యం ఉందనే విమర్శలు వెల్లువెత్తుతున్నాయి. ప్రమాదం జరిగిన 24 గంటల తర్వాత కూడా దాని గురించిన సమాచారాన్ని సేకరించలేకపోవడం అతి ఘోరమైన వైఫల్యంగా విమర్సలు వినిపిస్తున్నాయి. ఈ స్థితిలో అరవింద రావు తీవ్ర మనస్తాపానికి గురైనట్లు చెబుతున్నారు.

వైయస్ హెలికాప్టర్ ప్రమాదం నేపథ్యంలో డిజిపి ఎస్ఎస్పీ యాదవ్, ఇంటలిజెన్స్ చీఫ్ అరవిందరావులను తొలగించవచ్చుననే వార్తలు వచ్చాయి. అయితే డిజిపిని తొలగించే ఆలోచన లేదని ముఖ్యమంత్రి కె. రోశయ్య స్పష్టం చేశారు. అయితే అరవింద రావు మాత్రం తనను ఆ పదవి నుంచి తప్పించాలని కోరినట్లు సమాచారం. కొందరు పని కట్టుకుని తన ప్రతిష్టను దెబ్బ తీయడానికి ప్రయత్నిస్తున్నారని అరవిందరావు బాధపడుతున్నట్లు సమాచారం. ఇది వరకు కొంత మంది ఐపియస్ అధికారులు అరవింద రావుపై బహిరంగంగానే విమర్శలు చేశారు. ఆయన గత ఐదున్నరేళ్లుగా ఈ పదవిలో కొనసాగుతున్నారు.