కెజిహెచ్ జూనియర్ డాక్టర్ల సమ్మె

విశాఖపట్నం: విశాఖపట్నంలోని కెజిహెచ్ ఆస్పత్రి జూనియర్ వైద్యులు శుక్రవారం మెరుపు సమ్మెకు దిగారు. తమకు తగిన రక్షణ కల్పించలేదంటూ వారు సమ్మెకు దిగారు. వారు విధులు బహిష్కరించి సూపరింటిండెంట్ కార్యాలయం వద్ద ధర్నాకు దిగారు. కాలిన గాయాలతో గురువారం సాయంత్రం ఒక మహిళ ఆస్పత్రిలో చేరింది. 55 శాతం కాలిన గాయాలతో వచ్చిన ఆ మహిళకు వైద్యులు చికిత్స చేశారు. అయితే ఆమె మరణించింది. దాంతో ఆగ్రహించిన ఆమె బంధువులు జూనియర్ డాక్టర్లపై దాడి చేశారు. దీంతో వివాదం మొదలైంది. అయితే తగిన రక్షణ కల్పిస్తామని సూపరింటిండెంట్ హామీ ఇవ్వడంతో జూనియర్ డాక్టర్లు శాంతించారు. కానీ శుక్రవారం ఉదయం వచ్చేసరికి రక్షణ చర్యలేవీ లేకపోవడంతో వారు సమ్మెకు దిగారు.

ఇదిలా ఉంటే, విశాఖపట్నంలోని మరో ఆస్పత్రిలో కూడా శుక్రవారం గొడవ ప్రారంభమైంది. ఒక మహిళ ప్రసవం సందర్భంగా విక్టోరియా ఆస్పత్రిలో మరణించింది. ఆ మహిళతో పురుటి బిడ్డ కూడా మరణించింది. దీంతో ఆమె బంధువులు ఆందోళనకు దిగారు. వైద్యుల నిర్లక్ష్యం వల్లనే మహిళ మరణించిందని వారు ఆరోపిస్తున్నారు. దీంతో పోలీసులు అక్కడికి చేరుకుని పరిస్థితిని చక్కదిద్దే ప్రయత్నం చేస్తున్నారు.