మరో 17 స్వైన్ ఫ్లూ మరణాలు

న్యూఢిల్లీ: దేశవ్యాప్తంగా సోమవారం మరో 17 స్వైన్ ఫ్లూ మరణాలు నమోదయ్యాయి. వీటిలో పది మరణాలు కర్నాటక రాష్ట్రంలోనే నమోదయ్యాయి. దీంతో దేశవ్యాప్తంగా స్వైన్ ఫ్లూ వ్యాధికి బలైన వారి సంఖ్య 257కు చేరుకుంది. సోమవారం ఏడు మరణాలు నమోదైనట్లు అధికార వర్గాలు చెబుతున్నప్పటికీ మహారాష్ట్ర, గుజరాత్ ల్లో ముగ్గురేసి, ఆంధ్రప్రదేశ్ లో ఒక్కరు, కర్నాటకలో పది మంది స్వైన్ ఫ్లూ వల్ల మరణించినట్లు చెబుతున్నారు. కర్నాటకలో 8 నుంచి 18 తేదీల మధ్య మరణించిన పది మంది స్వైన్ ఫ్లూ వల్లనే మరణించినట్లు అధికారులు సోమవారం ధృవీకరించారు.

కర్నాటకలో మరో నాలుగు మరణాలు సంభవించాయని, అయితే అవి స్వైన్ ఫ్లూ వల్లనే సంభవించాయా లేదా అనేది పరీక్షల్లో తేలాల్సి ఉందని అధికారులంటున్నారు. తాజా మరణాలతో కర్నాటకలో స్వైన్ ఫ్లూ వల్ల మరణించినవారి సంఖ్య 79కు చేరుకుంది. దేశంలో రెండో అత్యధిక స్వైన్ ఫ్లూ మరణాలు సంభవించిన రాష్ట్రం కర్నాటకనే. మహారాష్ట్రలోని పూనేలో రెండు, నాగపూర్ లో ఒకటి మరణాలు నమోదయ్యాయి. దీంతో మహారాష్ట్రలో స్వైన్ ఫ్లూ వల్ల మరణించిన వారి సంఖ్య 106కు చేరుకుంది.