చిరు పార్టీలో ఎమ్మెల్యేల చిచ్చు

హైదరాబాద్: చిరంజీవి నాయకత్వంలోని ప్రజారాజ్యం పార్టీలో మరోసారి చిచ్చు పుట్టింది. ముఖ్యమంత్రిగా రోశయ్య సమర్థుడని చిరంజీవి ఇచ్చిన కితాబు పార్టీ శాసనసభ్యుల్లో తీవ్ర వ్యతిరేకతకు కారణమైంది. కొంత మంది పార్టీ శాసనసభ్యులు చిరంజీవి ప్రకటనను తీవ్రంగా వ్యతిరేకిస్తున్నట్లు సమాచారం. దివంగత నేత వైయస్ రాజశేఖర రెడ్డి తనయుడు వైయస్ జగన్ అనుకూల శాసనసభ్యులు చిరంజీవి ప్రకటనపై తీవ్ర అసంతృప్తి వ్యక్తం చేస్తున్నట్లు తెలుస్తోంది. అవసరమైతే జగన్ ముఖ్యమంత్రి కావడానికి పార్టీ అధినేతను ధిక్కరించి సహకరించడానికి వారు ముందుకు వస్తున్నట్లు ప్రచారం జరుగుతోంది.

ప్రజారాజ్యం పార్టీకి 18 మంది శాసనసభ్యులున్నారు. వీరిలో కొంత మంది దివంగత నేత వైయస్ రాజశేఖర రెడ్డికి అనుకూలంగా ఉన్నారని చాలా కాలం నుంచి ప్రచారం జరుగుతూనే ఉంది. శోభా నాగిరెడ్డి వంటి శాసనసభ్యులు ఎప్పుడైనా కాంగ్రెసులోకి వెళ్లిపోవచ్చునని ఊహాగానాలు చెలరేగాయి. అయితే ఆమెతో పాటు మిగతా శాసనసభ్యులు ఆ ఊహాగానాలను ఖండించారు. ప్రజారాజ్యం పార్టీలో వైయస్ అనుచర గణం ఉందని తాజా వివాదం బయటపెడుతోందని అంటున్నారు.