అవును, చికెన్ తింటా: నారాయణ

ఒంగోలు: తాను చికెన్ తింటానని, అయితే ఆరోగ్య శాఖ మంత్రి దానం నాగేందర్ లా కాదని సిపిఐ రాష్ట్ర కార్యదర్శి కె. నారాయణ అన్నారు. తాను జీవితంలో పారదర్శకంగా ఉంటానని ఆయన చెప్పుకున్నారు. తనపై దానం నాగేందర్ చేసిన వ్యాఖ్యలకు నారాయణ గురువారం మీడియా ప్రతినిధుల సమావేశంలో అదే స్థాయిలో జవాబు ఇచ్చారు. ముఖ్యమంత్రి డాక్టర్ వైయస్ రాజశేఖర రెడ్డి మరణించిన తర్వాత కోలుకోలేని స్థితిలో కాంగ్రెసు పడిపోయిందని ఆయన వ్యాఖ్యానించారు.

వైయస్ మరణాంతరం కాంగ్రెసు లెజిస్లేచర్ పార్టీ (సిఎల్పీ) సమావేశం నిర్వహించడానికి కూడా భయపడుతున్నారని ఆయన అన్నారు ముఖ్యమంత్రి రోశయ్య, మంత్రులు ద్వంద్వ ప్రమాణాలు పాటిస్తున్నారని ఆయన అన్నారు. మంత్రుల చిత్తం శివుడి మీద, మనసు ప్రసాదం మీద ఉందని ఆయన వ్యాఖ్యానించారు.