వ్యాధులపై శ్రద్ధ పెట్టండి: రోశయ్య

హైదరాబాద్: స్వైన్ ఫ్లూ, ఇతర అంటు వ్యాధులపై శ్రద్ధ వహించాలని ముఖ్యమంత్రి కె.రోశయ్య మంత్రులకు సూచించారు. గురువారం తన అధ్యక్షతన జరిగిన మంత్రివర్గ సమావేశంలో ఆయన ఈ సూచన చేశారు. స్వైన్ ఫ్లూపై, ఇతర అంటు వ్యాధులపై మంత్రివర్గ సమావేశంలో చర్చ జరిగింది. స్వైన్ ఫ్లూ నివారణకు విస్తృత స్థాయిలో ప్రచారం చేయాలని మంత్రి వర్గం నిర్ణయించింది. సీనియర్ ఆర్డీవోలకు జాయింట్ కలెక్టర్లుగా పదోన్నతి కల్పించాలని కూడా మంత్రి వర్గ సమావేశం నిర్ణయం తీసుకుంది.

వైయస్ అభయహస్తం పథకంలో భాగంగా నవంబర్ 1వ తేదీ నుంచి వారంపాటు పింఛన్లు పంపిణీ చేయాలని మంత్రి వర్గం నిర్ణయించినట్లు సమాచార శాఖ మంత్రి జె.గీతారెడ్డి చెప్పారు. మంత్రి వర్గ సమావేశం వివరాలను ఆమె మీడియా ప్రతినిధుల సమావేశంలో వెల్లడించారు. మహిళలపై యాసిడ్ దాడులను అరికట్టేందుకు ఆర్డినెన్స్ రూపంలో చట్టం తేవాలని నిర్ణయించినట్లు ఆమె తెలిపారు. చేనేత విధివిధానాలపై మంత్రివర్గంలో చర్చించినట్లు ఆమె చెప్పారు.

కర్నూలు జిల్లా ఆత్మకూరులోని నల్లకాలువ సమీపంలో దివంగత ముఖ్యమంత్రి వైయస్ రాజశేఖర రెడ్డి స్మృతి వనాన్ని ఏర్పాటు చేయాలని మంత్రివర్గం నిర్ణయించింది. ఐదు లక్షల రూపాయలతో కాలినడక దారి ఏర్పాటు చేస్తారు. రాష్ట్ర రాజధాని హైదరాబాదులో వైయస్ విగ్రహాన్ని స్థాపించాలని కూడా నిర్ణయించినట్లు గీతారెడ్డి తెలిపారు. ఇందుకు మంత్రివర్గ ఉప సంఘాన్ని నియమించినట్లు ఆమె తెలిపారు. జిల్లాల్లో వైయస్ విగ్రహాల ఏర్పాటుపై జిల్లా స్థాయిల్లోనే నిర్ణయం తీసుకోవాలని మంత్రి వర్గం అభిప్రాయపడింది.