మరింత చురుగ్గా కదలండి: బాబు

హైదరాబాద్: వరద బాధితులను ఆదుకోవడంలో ప్రభుత్వం మరింత చురుగ్గా వ్యవహరించాలని తెలుగుదేశం పార్టీ అధ్యక్షుడు నారా చంద్రబాబు నాయుడు డిమాండ్ చేశారు. ప్రజలను ఆదుకోవడంలో ప్రభుత్వం ఇప్పటికే జాప్యం చేసిందని ఆయన శనివారం మీడియా ప్రతినిధుల సమావేశంలో విమర్శించారు. ప్రభుత్వం నిస్సహాయ స్థితిలో ఉందని ముఖ్యమంత్రి కె.రోశయ్య అన్నారని, నిజానికి అది సరైన పద్ధతి కాదని, ప్రజలకు విశ్వాసం కలిగించే విధంగా ప్రభుత్వం వ్యవహరించాల్సి ఉందని ఆయన అన్నారు. వరద తాకిడి ప్రాంతాల్లో వైద్య సౌకర్యాలు కల్పించాలని, అంటువ్యాధుల నివారణకు చర్యలు తీసుకోవాలని ఆయన ప్రభుత్వాన్ని కోరారు. తమ పార్టీ నాయకులు వరద బాధితులను ఆదుకోవడానికి ఆయా ప్రాంతాల్లో ఉన్నారని ఆయన అన్నారు.

గత వందేళ్లలో ఇంతటి వరదలు ఎప్పుడూ రాలేదని, ఇటువంటి సందర్భాల్లో కేంద్ర ప్రభుత్వం కూడా తగిన విధంగా ముందుకు రావాలని ఆయన అన్నారు. రాష్ట్రానికి ఇంకా వరద ముప్పు తగ్గలేదని ఆయన అన్నారు. ఎగువ ప్రాంతాల నుంచి కృష్ణానదికి పెద్ద యెత్తున నీరు వచ్చి చేరుతోందని, ప్రమాదాన్ని తట్టుకోవడానికి ముందు జాగ్రత్త చర్యలు తీసుకోవడానికి చర్యలు తీసుకోవాలని ఆయన అన్నారు. కృష్ణానది కరకట్టలు తెగితే తీవ్ర ప్రమాదం వాటిల్లుతుందని ఆయన అన్నారు. విజయవాడకు పెద్ద యెత్తున ముప్పు పొంచి ఉందని ఆయన అన్నారు. ప్రస్తుతం చేయాల్సింది ప్రజల ఇబ్బందులు తగ్గించడమేనని, ఇందుకు ప్రభుత్వం తగిన విధంగా వ్యవహరించడం అవసరమని ఆయన అన్నారు. వరద బాధితులను ఆదుకోవడానికి వెంటనే కేంద్ర ప్రభుత్వం ముందుకు రావాలని, రాష్ట్ర ప్రభుత్వం కూడా వాస్తవ పరిస్థితులను ముందు పెట్టాలని ఆయన అన్నారు.