కెసిఆర్ ఆరోపణలపై మాట్లాడను: డిఎస్

హైదరాబాద్: వరద ముంపుపై తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు చేసిన ఆరోపణలపై తాను మాట్లాడబోనని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ అన్నారు. మానవ తప్పిదం వల్లనే, స్వార్థంతో కృష్ణానది జలాలో కోసం అక్రమ ప్రాజెక్టులు నిర్మించడం వల్లనే విపత్తు సంభవించిందని కెసిఆర్ చేసిన ఆరోపణలపై ఆయన శుక్రవారం మీడియా ప్రతినిధుల సమావేశంలో స్పందించడానికి నిరాకరించారు. కెసిఆర్ తన అభిప్రాయాలు చెప్పారని ఆయన అన్నారు.

గత ఐదేళ్లుగా జలయజ్ఞం అమలవుతుంటే కెసిఆర్ ఇప్పటి దాకా ఎందుకు మాట్లాడలేదని ఆయన ప్రశ్నించారు. ఇప్పుడే ఎందుకు మాట్లాడుతున్నారో అర్థం కావడం లేదని ఆయన అన్నారు. తాము తొలుత వరద బాధితులకు సహాయం అందించడంపై దృష్టి పెడతామని ఆయన చెప్పారు. ఆ తర్వాతే ప్రాజెక్టులు, సాంకేతిక విషయాలను పరిశీలిస్తామని ఆయన చెప్పారు.