తెలంగాణ సాధనే అంతిమ లక్ష్యం: నాయని

హైదరాబాద్: తెలంగాణ రాష్ట్ర సాధనే తమ ఉద్యమాల అంతిమ లక్ష్యమని తెలంగాణ రాష్ట్ర సమితి (తెరాస) నాయకుడు నాయని నర్సింహారెడ్డి అన్నారు. హైదరాబాద్ ఫ్రీజోన్ కు వ్యతిరేకంగా బుధవారం తెరాస జైల్ భరో కార్యక్రమాన్ని చేపట్టింది. ఈ సందర్భంగా ఆయన మాట్లాడారు. ప్రత్యేక రాష్ట్రం ఏర్పడితే ఫ్రీజోన్ లాంటి సమస్యలు ఎగిరిపోతాయని ఆయన అన్నారు.

తమ ప్రాంత ఉద్యోగులకు అన్యాయం జరగకూడదనే ఉద్దేశంతో తాము జైల్ భరో కార్యక్రమాన్ని చేపట్టినట్లు ఆయన తెలిపారు. తెలంగాణ జిల్లాలో జైల్ భరో కార్యక్రమానికి మంచి స్పందన ఉందని ఆయన చెప్పారు. ఉద్యమాన్ని తాము శాంతియుతంగా నిర్వహిస్తామని, ఎలాంటి ఘర్షణలకు తావు లేకుండా చూస్తామని, ఇందుకు పోలీసులు కూడా సహకరించాలని ఆయన అన్నారు. జైల్ భరో కార్యక్రమం సందర్భంగా హైదరాబాదులోని సచివాలయం వద్ద భారీ బందోబస్తు ఏర్పాటు చేశారు. పోలీసులు అరెస్టు చేసిన నాయకులను, కార్యకర్తలను విడుదల చేయాలని తెరాస డిమాండ్ చేసింది.