కాంగ్రెస్ తో ప్రజారాజ్యం పొత్తు!

హైదరాబాద్: గ్రేటర్ హైదరాబాద్ ఎన్నికల్లో ప్రజారాజ్యం, కాంగ్రెస్‌ పొత్తు కుదిరే అవకాశాలు కన్పిస్తున్నాయి. వైఎస్‌ మృతి తర్వాత జరుగుతున్న తొలి ఎన్నికలు కావడంతో ఇవి కాంగ్రెస్‌ నేతలకు ప్రతిష్ఠాత్మకంగా మారాయి. ఒంటరిపోరుతో అసెంబ్లీలో అతి తక్కువ స్థానాలకే పరిమితమైన ప్రజారాజ్యం కూడా 'గ్రేటర్‌'లో తమ ప్రాధాన్యాన్ని చాటుకోవాలని భావిస్తోంది. ఈ లక్ష్యాల సాధనకోసం ఉమ్మడిగా కృషి చేయాలని రెండు పార్టీల నేతలు భావిస్తున్నారు. శనివారం హైదరాబాద్‌లో డీఎస్‌తో పీఆర్పీ నేతలు అల్లు అరవింద్‌, రామచంద్రయ్య భేటీ అయినట్టు తెలుస్తోంది. గ్రేటర్‌లో పొత్తుపై చర్చించారు. చిరంజీవి ఈ రోజు కేరళ నుంచి హైదరాబాద్ రానున్నారు.

ఆ తర్వాత వీరి సమక్షంలోనే డీఎస్‌, కేరళలో ఉన్న చిరంజీవి ఫోన్‌లో చర్చించుకున్నారు. నెలరోజులుగా ఢిల్లీ స్థాయిలో ఈ రెండు పార్టీల మధ్య మైత్రీ ప్రయత్నాలు సాగుతున్నాయి. ఒంటరి పోటీతో లాభం లేదని పీఆర్పీ భావిస్తోంది. పార్టీ నేతలు కూడా పొత్తు ఉంటేనే మేలని చెబుతున్నారు. మరో వైపు... కలిసి పోరాడితే ఇద్దరికీ మేలని పీఆర్పీకి కాంగ్రెస్‌ చెబుతూ వస్తోంది.