ఏ మంత్రినీ తొలగించను: యడ్యూరప్ప

బెంగుళూర్: ఏ మంత్రిని కూడా తాను తొలగించబోనని కర్నాటక ముఖ్యమంత్రి బిఎస్ యడ్యూరప్ప స్పష్టం చేశారు. అయితే అసమ్మతి వాదుల కోరిక మేరకు తన వ్యవహార శైలిని మార్చుకుంటానని ఆయన సోమవారం ఉదయం మీడియా ప్రతినిధుల సమావేశంలో చెప్పారు. రాష్ట్రంలో నెలకొన్న రెండు వారాల సంక్షోభానికి తెర పడిన తర్వాత మంత్రి గాలి జనార్దన్ రెడ్డి వర్గంతో సామరస్య పరిష్కారం లభించింది. ఈ పరిష్కారం తర్వాత ఆయన ఢిల్లీ నుంచి తిరిగి వచ్చారు.

రాష్ట్రంలోని వ్యవహారాలన్నింటినీ పరిశీలించేందుకు సమన్వయ కమిటీని ఏర్పాటు చేయాలనే ఒప్పందం ఇరు వర్గాల మధ్య కుదిరింది. మహిళా మంత్రిని తొలగించి ఆమె స్థానంలో స్పీకర్ ను మంత్రివర్గంలోకి తీసుకోవాలని కూడా ఇరు వర్గాల మధ్య ఒప్పందం కుదిరినట్లు వార్తలు వచ్చాయి. అయితే తన మంత్రివర్గం నుంచి ఎవరినీ కూడా తొలగించేది లేదని యడ్యూరప్ప చెప్పారు. రేపటి నుంచి పూర్తి భిన్నమైన యడ్యూరప్పను చూస్తారని ఆయన అన్నారు. ఇప్పుడు తనకు సంతోషంగా ఉందని ఆయన అన్నారు.

తాను, రెడ్డి సోదరులు త్వరలో భేటీ అయి, సమస్యను పరిష్కరించుకుంటామని ఆయన చెప్పారు. త్వరలో రాష్టానికి పార్టీ కేంద్ర నాయకత్వం వస్తుందని ఆయన చెప్పారు. త్వరలో తాను వరద తాకిడి ప్రాంతాల్లో పర్యటించనున్నట్లు ఆయన తెలిపారు.