ముంబై తరహా దాడుల ముప్పు: పిఎం

వాషింగ్టన్: ముంబై దాడులు జరిగి ఏడాది గడుస్తున్న సందర్భంగా పాకిస్తాన్ లోని ఉగ్రవాద గ్రూపులు అటువంటి దాడులకు పాల్పడడానికి కుట్ర చేస్తున్నాయని ప్రధాని డాక్టర్ మన్మోహన్ సింగ్ అన్నారు. పాకిస్తాన్ ఉగ్రవాదాన్ని ప్రభుత్వ విధానంగా వాడడం విచారకరమని ఆయన అన్నారు. పొరుగు దేశాలపై తమ దేశాన్ని ఉగ్రవాదులు వాడుకునేందుకు వీలు లేకుండా చేసిన తర్వాత పాకిస్తాన్ తో అన్ని విషయాలపై చర్చలకు తాము సిద్ధమని ఆయన చెప్పారు. వాషింగ్టన్ పోస్టుకు ఇచ్చిన ఇంటర్వ్యూలో తన అభిప్రాయాలను ఆయన వెల్లడించారు.

పాకిస్తాన్ సహాయంతో సాగుతున్న ఉగ్రవాదానికి తమ దేశం బాధితురాలని ఆయన అన్నారు. ముంబై తరహా దాడులకు పాకిస్తాన్ లోని ఉగ్రవాదులు కుట్ర చేస్తున్నట్లు తనకు ప్రతి రోజూ నిఘా సమాచారం వస్తోందని ఆయన చెప్పారు. ద్వైపాక్షిక చర్చల ద్వారా అన్ని సమస్యలను పరిష్కరించుకోవడానికి భారత్ సిద్ధంగా ఉందని, అయితే పాకిస్తాన్ తన దేశంలోని ఉగ్రవాదాన్ని మట్టుపెట్టాలని ఆయన అన్నారు. భారత్ గురించి పాకిస్తాన్ భయపడాల్సిన అవసరం లేదని ఆయన అన్నారు. వాషింగ్టన్ పోస్టు ప్రధాని మన్మోహన్ సింగ్ అమెరికా పర్యటన సందర్భంగా ఆదివారం ఈ ఇంటర్వ్యూను ప్రచురిస్తుంది.