పదవులకు అర్హత సరిపోదు: రోశయ్య

హైదరాబాద్: అర్హులైనవారందరికీ పదవులు వస్తాయనుకోవడం సరి కాదని, అర్హతతో పాటు అదృష్టం కలిసి రావాలని ముఖ్యమంత్రి కె.రోశయ్య అభిప్రాయపడ్డారు. గాంధీభవన్ లో జరిగిన కొమ్మినేని శేషగిరి రావు స్మారక అవార్డుల ప్రదాన కార్యక్రమంలో ఆయన మంగళవారం ఆ వ్యాఖ్య చేశారు. పార్టీ కోసం ఏళ్ల తరబడి పనిచేసినా కొమ్మినేని శేషగిరిరావుకు తగిన న్యాయం జరగలేదని రాజీవ్ గాంధీ పంచాయత్ రాజ్ సంఘటన రాష్ట్ర అధ్యక్షుడు నాగుండి సత్యనారాయణరావు చేసిన వ్యాఖ్యపై ఆయన స్పందిస్తూ ఆ విధంగా అన్నారు.

శాసనమండలి చైర్మన్ చక్రపాణికి రోశయ్య అవార్డును అందించారు. పశ్చిమ గోదావరి జిల్లా పంచాయత్ రాజ్ సంఘటన అధ్యక్షుడు చిన్నమల్లు రాయుడికి ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్ అవార్డును అందించారు. కొమ్మినేని శేషగిరిరావు చిరస్థాయిగా నిలిచిపోయే రీతిలో పార్టీకి సేవలు చేశారని ముఖ్యమంత్రి అన్నారు.