చాముండిపై నాన్ బెయిలబుల్ వారెంట్ పొడిగింపు

విజయవాడ: మహిళా క్రికెటర్లపై లైంగికంగా వేధించారంటూ నమోదైన కేసులో ఆంధ్రా క్రికెట్‌ అసోసియేషన్‌ మాజీ కార్యదర్శి వి చాముండేశ్వరినాథ్‌పై వచ్చే నెల 30లోగా నాన్‌ బెయిలబుల్‌ వారెంటు అమలు(అరెస్టు) చేయాలని ఒకటో అదనపు చీఫ్‌ మెట్రోపాలిటన్‌ మేజ్రిస్టేటు ఉత్తర్వులిచ్చారు. వివరాల ప్రకారం చాముండి తమను లైంగికంగా వేధించేవార ని కొత్తపేటకు చెందిన దుర్గాభవాని మాచవరం పోలీసులకు గతంలో ఫిర్యాదు చేసింది.ఈ మేరకు చాముండిపై తొలుత సెక్షన్‌ 509, 506 ఐపీసీ ప్రకారం కేసు నమోదు చేశారు.

మహిళా క్రికెటర్ల సాక్ష్యాల ఆధారంగా కేసును సెక్షన్‌ 354 ఐపీసీగా మారుస్తూ కోర్టులో పోలీసులు మెమో దాఖలు చేశారు. దీనిపై చాముండి హైకోర్టును ఆశ్రయించారు. రెండువారాల్లో దర్యాప్తు పూర్తి చేసి చార్జిషీటు దాఖ లు చేయాలని పోలీసులను హైకోర్టు ఆదేశించింది. పోలీసులు దర్యాప్తు పూర్తి చేసి గత నెల 7న కోర్టులో చార్జిషీటు దాఖలు చేశారు.చార్జిషీటు వివరాలను పరిశీలించిన న్యాయమూర్తి చాముండిపై నాన్‌ బెయిలబుల్‌ వారెంటు జారీ చేసి కేసును బుధవారానికి వాయిదా వేశారు.