కెసిఆర్ ను ఆస్పత్రికి తరలించండి: కవిత

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును ఖమ్మం జైలు నుంచి ఆస్పత్రికి తరలించాలని ఆయన కూతురు, తెలంగాణ జాగృతి వ్యవస్థాపకురాలు కల్వకుంట్ల కవిత ప్రభుత్వాన్ని కోరారు. ప్రజా సంఘాల నాయకులు కోదండ రామ్ తదితరులతో కలిసి ఆమె సోమవారం శాసనసభ ఎదురుగా గల తెలంగాణ అమర వీరుల స్థూపం వద్ద ధర్నా చేశారు. తన తండ్రి కెసిఆర్ ఆత్మహత్యకు పాల్పడలేదని, ఆత్మత్యాగానికి సిద్ధపడ్డారని, కెసిఆర్ త్యాగానికి సిద్ధపడ్డారని, అందువల్ల తెలంగాణ ప్రజలు, విద్యార్థులు అత్మహత్యలు చేసుకోవడం సరికాదని ఆమె మీడియా ప్రతినిధులతో అన్నారు. బతికి ఉండి తెలంగాణను సాధించి, బంగారు తెలంగాణను నిర్మించుకుందామని ఆమె పిలువునిచ్చారు.

కాగా, కెసిఆర్ కుమారుడు, సిరిసిల్ల శాసనసభ్యుడు కెటి రామారావు వరంగల్ జైల్లో నిరాహార దీక్ష చేస్తున్నారు. ఆయన బెయిల్ తీసుకోవడానికి నిరాకరించారు. కెసిఆర్ ను విడుదల చేసే వరకు అన్నపానీయాలు ముట్టబోనని ఆయన చెప్పారు. అత్మహత్యలకు పాల్పడవద్దని కాకతీయ విశ్వవిద్యాలయం మాజీ వైస్ చాన్సలర్ జయశంకర్ విద్యార్థులకు విజ్ఞప్తి చేశారు. ఆత్మత్యాగాలు చేయాల్సి వస్తే తమ తరంవారిమి చేస్తామని ఆయన అన్నారు. ఇదిలా ఉంటే, కెసిఆర్ ను చూడడానికి తెరాస శాసనసభ్యులు హరీష్ రావు, రవీందర్ రెడ్డి ఖమ్మం బయలుదేరి వెళ్లారు. ఆత్మహత్యలకు పాల్పడవద్దని హరీష్ రావు కూడా విద్యార్థులకు విజ్ఞప్తి చేశారు. కెసిఆర్ ను ఖమ్మం జైలులో నిర్బంధించడంపై కోర్టులో దాఖలైన పిటిషన్ పై వాదనలు పూర్తయ్యాయి. కోర్టు తన నిర్ణయాన్ని రేపటికి (మంగళవారానికి) వాయిదా వేసింది.