హైద్రాబాద్ లో లగడపాటి దీక్షకు అనుమతి లేదు: ఐజి

హైదరాబాద్‌: రాష్ట్ర రాజధానిలో ఎటువంటి ఆందోళనలు చేపట్టవద్దని విజిలెన్స్‌ ఐజీ అనురాధ స్పష్టం చేశారు. నిరసనకారులు తమ జిల్లాలకే పరిమితం కావాలన్నారు. హైదరాబాద్‌కు రావద్దన్నారు. విజయవాడ ఎంపీ లగడపాటి రాజ్‌గోపాల్‌ దీక్షకు ఎటువంటి అనుమతి లేదని అనురాధ చెప్పారు. రాష్ట్రంలో నెలకొన్న పరిస్థితులను ఎప్పటికప్పుడు సమీక్షిస్తున్నామని, ఇతర జిల్లాల నుంచి ఎవరైనా పెద్ద సంఖ్యలో నగరానికి వస్తే పోలీసులకు సమాచారం అందించాలని నగరవాసులకు ఐజీ సూచించారు.

విధ్వంసాలకు పాల్పడవద్దని రాష్ట్ర ప్రజానీకాన్ని కోరిన అనురాధ, 'మీరు చేసే విధ్వంసం చిన్నదైనా దాని ప్రభావం తీవ్రంగా ఉంటుంది,' అని హెచ్చరించారు. ఆంధ్రా, రాయలసీమల్లో చోటుచేసుకున్న వివిధ అల్లర్లకు సంబంధించి 24 మందిని అరెస్టు చేశామన్నారు.