లగడపాటిని నిమ్స్ నుంచి తరలిస్తారా?

హైదరాబాద్: విజయవాడ ప్రభుత్వాస్పత్రి నుంచి వచ్చిన కాంగ్రెసు పార్లమెంటు సభ్యుడు లగడపాటి రాజగోపాల్ ను ఎక్కువ రోజులు హైదరాబాదులో ఉంచే అవకాశాలు లేవని తెలుస్తోంది. హైదరాబాద్ నుంచి లగడపాటిని తరలించాలని ప్రభుత్వం ఆలోచిస్తున్నట్లు సమాచారం. ఆయనను విజయవాడ ఆస్పత్రికి గానీ గుంటూరు జిల్లా మంగళగిరి ఎన్నారై ఆస్పత్రికి గానీ తరలించే అవకాశాలున్నట్లు తెలుస్తోంది. విజయవాడ నుంచి మంగళగిరికి తరలించే ప్రయత్నాలు జరుగుతున్న సమయంలోనే ఆయన పోలీసుల కళ్లు గప్పి విజయవాడ నుంచి తప్పించుకుని హైదరాబాదులోని నిమ్స్ కు వచ్చారు. నిమ్స్ లో ఆయన మిలీనియం బ్లాక్ లో ప్రస్తుతం చికిత్స పొందుతున్నారు. ఆయన సోమవారం నిమ్స్ లో ఇంతకు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చేరిన గదిలోనే చేరారు. ఆ తర్వాత ఆయనను మిలీనియం బ్లాక్ కు చేర్చారు.

కాగా, లగడపాటి రాజగోపాల్ రావడంతో నిమ్స్ వద్ద తీవ్ర ఉద్రిక్త పరిస్థితులు నెలకొన్నాయి. లగడపాటికి వ్యతిరేకంగా తెలంగాణవాదులు నినాదాలు చేశారు. లగడపాటి గోబ్యాక్ అంటూ నినాదాలు చేశారు. దీంతో నిమ్స్ వద్ద భారీ బందోబస్తు ఏర్పాటు చేశారు. నిమ్స్ వద్ద భద్రతా బాధ్యతలను ఐపియస్ అధికారి సురేంద్రబాబుకు అప్పగించారు. తెలంగాణవాదులను రెచ్చగొట్టే ఉద్దేశంతోనే లగడపాటి హైదరాబాదుకు వచ్చినట్లు భావిస్తున్నారు. ఆయనను నిమ్స్ నుంచి వేరే ప్రాంతానికి తరలించాలని కాంగ్రెసు తెలంగాణ నాయకులు కూడా కోరుతున్నారు. పైగా, వైయస్ వివేకానందరెడ్డి, దేవినేని ఉమా మహేశ్వర రావులాంటి సమైక్యాంధ్ర ఆందోళనకారులను కూడా నిమ్స్ కు తరలించాలనే డిమాండ్ వస్తోంది. దీంతో లడపాటిని మరో ప్రాంతానికి తరలించడమే భద్రతా కారణాల రీత్యా మంచిదనే భావన వ్యక్తమవుతోంది.