దాడి చేసింది వారి మనుషులే: జెఎసి

హైదరాబాద్: తెలుగుదేశం నాయకులపై దాడి చేసింది తామ కాదని విద్యార్థుల సంయుక్త కార్యాచరణ సమితి (జెఎసి) నాయకులు స్పష్టం చేశారు. తెలుగుదేశం నాయకుడు నాగం జనార్దన్ రెడ్డిని కాపాడుకున్నది తామేనని వారన్నారు. దాడి చేసింది కాంగ్రెసు నాయకులు వైయస్ జగన్ లేదా లగడపాటి రాజగోపాల్ లేదా సినీ నటుడు మోహన్ బాబు మనుషులై ఉంటారని వారన్నారు. దాడి చేసిందని చెప్పడానికి టీవీ క్లిప్పింగులు చూసుకోవచ్చునని వారన్నారు. విద్యార్థులకు సంఘీభావం తెలపడానికి ఉస్మానియాకు వచ్చిన తెలుగుదేశం నాయకులు తీవ్రంగా దాడి చేశారు. తమకు రక్షణ కావాలని ఉస్మానియా విద్యార్థులు కోరుతున్నారు.

బయటి వ్యక్తులే తెలుగుదేశం నాయకులు దాడి చేశారని వారు ఆరోపించారు. నాగం జనార్దన్ రెడ్డిపై జరిగిన దాడిని ఆంధ్రజ్యోతి టీవీ చానెల్ స్పష్టంగా ప్రసారం చేసింది.ఆ టీవీ క్లిప్పింగుల్లో ఇద్దరు ముగ్గురు వ్యక్తులు నాగం జనార్దన్ రెడ్డిపై దాడి చేస్తుండడం, రక్షణగా విద్యార్థులు వస్తుండడం ఆంధ్రజ్యోతి టీవీ చానెల్ వీడియో క్లిప్పింగుల్లో స్పష్టంగా కనిపించింది. నాగంపై దాడి తర్వాత ఆ వ్యక్తే ఇతర తెలుగుదేశం నాయకులపైకి వెళ్లి దాడి చేయడం కనిపించింది. సంఘటనా స్థలంలో ఒక రివాల్వర్ లభించింది. అది తెలుగుదేశం నాయకుడు ఎర్రబెల్లి దయాకర రావుదని తెలుస్తోంది. ఓయులోకి బయటి వ్యక్తులు రాకూడదని ఐజి అనురాధ విజ్ఞప్తి చేశారు.