235 మంది శవాలు, శ్మశానంగా మారిన నగరాలు..
వెనిజులాలో ప్రకృతి కన్నెర్ర జేసింది. ఒకే ఒక్క నిమిషం వ్యవధిలో సంభవించిన రెండు శక్తివంతమైన భూకంపాలు ఆ దేశాన్ని అతలాకుతలం చేశాయి. శవాల దిబ్బలుగా మారిన భవన శిథిలాల కింద ప్రాణాల కోసం కొట్టుమిట్టాడుతున్న తమ వారిని కాపాడుకునేందుకు బాధితులు గుండె లబోదిబోమంటుండగా, శిథిలాలను తొలుచుకుంటూ రక్షక సిబ్బంది రేయింబవళ్లు శ్రమిస్తున్నారు. 24 గంటల ముందు వరకు సందడిగా ఉన్న భవనాలు నేడు శిథిలాలై.. శ్మశాన వాటికలను తలపిస్తున్నాయి.
బుధవారం రాత్రి వేళ ఉత్తర వెనిజులా ప్రాంతాన్ని ఒకే ఒక్క నిమిషం వ్యవధిలో రెండు భారీ భూకంపాలు కుదిపేశాయి. రిక్టర్ స్కేలుపై వీటి తీవ్రత 7.2 మరియు 7.5గా నమోదైనట్లు అమెరికా భూగర్భ సర్వే సంస్థ (USGS) వెల్లడించింది. ఈ ఘోర విపత్తులో ఇప్పటివరకు కనీసం 235 మంది ప్రాణాలు కోల్పోగా, గాయపడిన వారి సంఖ్య 4,300 దాటిపోయింది. వీరిలో 1,500 మందికి ప్రాణాపాయ స్థితిలో ఉన్నారు. రాజధాని కరాకస్తో పాటు తీరప్రాంతాలు పూర్తిగా ధ్వంసమయ్యాయి. ప్రకంపనలు సృష్టించిన భయాందోళనల నుంచి జనం ఇంకా తేరుకోకముందే, వరుస ఆప్టర్ షాక్లు వణుకు పుట్టిస్తున్నాయి.
శ్మశానాన్ని తలపిస్తున్న 'లా గుఐరా'.. దిక్కుతోచని స్థితిలో బాధితులు
భూకంప ధాటికి అత్యంత ఘోరంగా దెబ్బతిన్న 'లా గుఐరా' ప్రాంతాన్ని ప్రభుత్వం విపత్తు ప్రాంతంగా ప్రకటించింది. ఇక్కడ దాదాపు 250కి పైగా బహుళ అంతస్తుల భవనాలు, ఇళ్లు నేలమట్టమయ్యాయి. వందలాది మంది ప్రజలు ఇప్పటికీ కూలిపోయిన కాంక్రీట్ దిమ్మెల కింద ప్రాణాలతో కొట్టుమిట్టాడుతున్నారు. విద్యుత్ సరఫరా నిలిచిపోవడం, రోడ్లు ధ్వంసం కావడం వల్ల సహాయక చర్యలకు తీవ్ర ఆటంకం కలుగుతోంది.
కూలిపోయిన భవనాల వద్ద తమ బంధువులు, పిల్లలు బతికే ఉన్నారేమోనన్న ఆశతో వేలాది కుటుంబాలు కన్నీరుమున్నీరుగా విలపిస్తున్నాయి. సరైన పరికరాలు లేకపోవడంతో స్థానికులు చేతులతోనే శిథిలాలను తొలగించడానికి ప్రయత్నిస్తున్నారు. శిథిలాల లోపల నుంచి వినిపిస్తున్న మూలుగులు, ఆర్తనాదాలు అక్కడ ఉన్నవారి గుండెలను పిండేస్తున్నాయి.
"వాళ్లు ఇంకా బతికే ఉన్నారు.. కానీ కాపాడలేకపోతున్నాం!"
"మా చిన్నారి లోపల ఇరుక్కుపోయింది. దయచేసి ఎవరైనా వచ్చి సాయం చేయండి.. సైన్యాన్ని పంపండి" అంటూ లా గుఐరాకు చెందిన డాని రిజో (48) అనే నివాసి కన్నీళ్లతో వేడుకున్నాడు. మరో రెస్క్యూ సైట్ వద్ద ఆంటోనియో బెర్ముడెజ్ అనే స్థానికుడు మాట్లాడుతూ, "శిథిలాల కింద ఉన్నవాళ్లు ఇంకా శ్వాస పీలుస్తున్నారు.. వాళ్లు బతికే ఉన్నారు. కానీ మా దగ్గర ఎలాంటి యంత్రాలు, పరికరాలు లేవు. వాళ్లను బయటకు తీసే మార్గం లేక చేతులు ముడుచుకుని చూడటం తప్ప మేమేమీ చేయలేకపోతున్నాం" అంటూ ఆవేదన వ్యక్తం చేశాడు.
రంగంలోకి అంతర్జాతీయ సమాజం
వెనిజులా చరిత్రలోనే అత్యంత ఘోరమైన ఈ భూకంపం కారణంగా ఆసుపత్రులు, ప్రభుత్వ కార్యాలయాలు, కరాకస్ ప్రధాన అంతర్జాతీయ విమానాశ్రయం సైతం తీవ్రంగా దెబ్బతిన్నాయి. దీంతో బాధితులకు వైద్యం అందించడం, సహాయక సామగ్రిని చేరవేయడం సవాలుగా మారింది.
ఈ విపత్కర పరిస్థితుల్లో వెనిజులాను ఆదుకునేందుకు అంతర్జాతీయ సమాజం ముందుకు వచ్చింది. అమెరికా, స్పెయిన్, ఫ్రాన్స్, స్విట్జర్లాండ్, మెక్సికో దేశాలు తమ రెస్క్యూ టీమ్లను రంగంలోకి దించాయి. అమెరికా ఇప్పటికే 150 మిలియన్ డాలర్ల ఆర్థిక సాయంతో పాటు సైనిక వనరులను సహాయక చర్యల కోసం మోహరించింది. శిథిలాలను పూర్తిగా తొలగిస్తే తప్ప అసలు ఎంతమంది చనిపోయారనేది చెప్పలేమని, మృతుల సంఖ్య భారీగా పెరిగే ప్రమాదం ఉందని అధికారులు ఆందోళన వ్యక్తం చేస్తున్నారు.
Click it and Unblock the Notifications
Sign in with Google