రాజేంద్రనాథ్ రెడ్డిపై సస్పెన్షన్ ఎత్తివేత

హైదరాబాద్: విజయవాడ పోలీసు కమిషనర్ రాజేంద్రనాథ్ రెడ్డిపై సస్పెన్షన్ ను రాష్ట్ర ప్రభుత్వం ఎత్తేసింది. కాంగ్రెసు పార్లమెంటు సభ్యుడు లగడపాటి రాజగోపాల్ పరారీ వ్యవహారంలో రాజేంద్రనాథ్ రెడ్డితో పాటు మరో ఐదుగురు పోలీసులను ప్రభుత్వం సస్పెండ్ చేసిన విషయం తెలిసిందే. మరో ఐదుగురు పోలీసులపై కూడా సస్పెన్షన్ ఎత్తివేతకు రాష్ట్ర పోలీసు డైరెక్టర్ జనరల్ (డిజిపి) గిరీష్ కుమార్ నిర్ణయం తీసుకున్నారు.

సమైక్యాంధ్ర డిమాండ్ తో నిరాహార దీక్ష చేస్తూ లగడపాటి రాజగోపాల్ విజయవాడ ఆస్పత్రి నుంచి పోలీసుల కళ్లు గప్పి మాయమై హైదరాబాద్ లో తేలిన విషయం తెలిసిందే. ఈ వ్యవహారంపై రాజేంద్రనాథ్ రెడ్డిని ప్రభుత్వం సస్పెండ్ చేసింది. ఈ సంఘటనపై ప్రభుత్వం విచారణకు ఆదేశించింది. ఈ వ్యవహారంలో పోలీసుల తప్పు లేదని, మీడియాతో మాట్లాడుతానని చెప్పి లగడపాటి మాయమయ్యారని విచారణలో తేలింది. దీంతో పోలీసులపై కూడా సస్పెన్షన్ ఎత్తేయాలని డిజిపి నిర్ణయం తీసుకున్నారు.