తెలంగాణపై కాంగ్రెసులో మాటల యుద్ధం

హైదరాబాద్: తెలంగాణపై కాంగ్రెసులో రెండు ప్రాంతాల మధ్య వివాదం మరింత ముదిరింది. సీమాంధ్ర, తెలంగాణ నాయకుల మధ్య శుక్రవారం తీవ్ర స్థాయిలో వాగ్వివాదం చెలరేగింది. ప్రత్యేక తెలంగాణ ఇస్తామని కాంగ్రెసు ఎప్పుడూ చెప్పలేదని రాష్ట్ర దేవాదాయ శాఖ మంత్రి గాదె వెంకటరెడ్డి అన్నారు. దానిపై కాంగ్రెసు సీనియర్ నాయకుడు, రాజ్యసభ సభ్యుడు కె. కేశవరావు తీవ్రంగా మండిపడ్డారు. రెండో ఎస్సార్సీయే కాంగ్రెసు పార్టీ విధానమని గాదె వెంకటరెడ్డి అన్నారు. తెలంగాణ రాష్ట్ర ఏర్పాటు కోసం న్యాయమూర్తులతో కమిటీ వేయాలని ఆయన అన్నారు. తెలంగాణ ఇస్తామని కాంగ్రెసు ఎన్నికల ప్రణాళికల్లో హామీ ఇవ్వలేదని ఆయన అన్నారు. తెలంగాణపై దివంగత నేత వైయస్ రాజశేఖర రెడ్డి 2009 ఫిబ్రవరి 12వ తేదీన వేసిన కమిటీని పరిగణనలోకి తీసుకోవాలని ఆయన సూచించారు.

గాదె వెంకటరెడ్డి ప్రకటనపై కేశవరావు తీవ్రంగా మండి పడ్డారు. ఎన్నికల ప్రణాళికలోనూ యుపిఎ ఉమ్మడి కార్యాచరణ ప్రణాళికలోనూ తెలంగాణ ప్రస్తావన ఉందని కేశవరావు అన్నారు. గాదె వెంకటరెడ్డి మాటల్లో నిజం లేదని ఆయన అన్నారు. ఎన్నో సార్లు కాంగ్రెసు తెలంగాణ ఇస్తామని చెప్పిందని ఆయన అన్నారు. వైయస్ కమిటీ ఏర్పాటు ప్రకటనకు క్రమంగా కాలం చెల్లిపోయిందని ఆయన అన్నారు. తెలంగాణ కోసం గత 50 ఏళ్లలో ఇచ్చిన హామీలను ఎలా రాసిందీ ఆయన వివరించారు.