సోనియా నిర్ణయానికి కట్టుబాటు: కన్నా లక్ష్మినారాయణ

గుంటూరు: తెలంగాణపై తాము తమ కాంగ్రెసు పార్టీ అధ్యక్షురాలు సోనియా గాంధీ నిర్ణయానికి కట్టుబడి ఉంటామని రాష్ట్ర మంత్రి కన్నా లక్ష్మినారాయణ చెప్పారు. సోనియా తీసుకునే నిర్ణయానికి కాంగ్రెసు వారంతా కట్టుబడి ఉంటారని ఆయన శనివారం మీడియా ప్రతినిధులతో చెప్పారు. కాంగ్రెసు వైఖరి ఇదని సోనియా గాంధీ చెప్పాలని, అప్పుడు కాంగ్రెసు అధిష్టానం నిర్ణయానికి కట్టుబడి ఉంటామని ఆయన అన్నారు. తెలంగాణపై తెలుగుదేశం పార్టీ అధ్యక్షుడు నారా చంద్రబాబు నాయుడు తన వైఖరిని వెల్లడించాలని ఆయన డిమాండ్ చేశారు.

సమైక్యాంధ్ర కోసం తాము సీమాంధ్ర ఐక్య కార్యాచరణ వేదిక (జెఎసి)లో చేరబోమని ప్రాథమిక పాఠశాలల మంత్రి మాణిక్యవర ప్రసాద్ చెప్పారు. ఆయన హైదరాబాదులో మీడియా ప్రతినిధులతో మాట్లాడారు. ముఖ్యమంత్రి కె. రోశయ్యపై ఐటి శాఖ మంత్రి కోమటిరెడ్డి వెంకటరెడ్డి చేసిన వ్యాఖ్యలతో ఆయన విభేదించారు. ముఖ్యమంత్రికి పక్షపాత వైఖరి అంటగట్టడం సరి కాదని ఆయన అన్నారు.