విభజన ఆందోళనలకు తాత్కాలిక విరామం

హైదరాబాద్: తెలంగాణ అనుకూల, వ్యతిరేక ఆందోళనలకు తాత్కాలికంగా విరామం లభించింది. తెలంగాణ రాష్ట్ర ఏర్పాటుకు నిర్దిష్ట కాలపరిమితి ప్రకటించాలని డిమాండ్ చేస్తూ ఆందోళన కొనసాగిస్తున్న తెలంగాణ విద్యార్థి సంఘాల సంయుక్త కార్యాచరణ కమిటీ (జెఎసి) తాత్కాలికంగా విరామం ఇవ్వడానికి నిర్ణయించుకుంది. పరీక్షలు పూర్తయ్యే వరకు ఆందోళనలను విరమిస్తున్నట్లు ప్రకటించింది. పరీక్షలు పూర్తైన తర్వాత తిరిగి ఆందోళనలను ఉధృతం చేస్తామని ప్రకటించింది. ఆందోళనలు విరమించి, రాష్ట్రంలో శాంతియుత పరిస్థితులకు సహకరించాలని కేంద్ర హోం మంత్రి చిదంబరం నిర్వహించిన అఖిల పక్ష సమావేశం ద్వారా అన్ని రాజకీయ పార్టీలు విజ్ఞప్తి చేశాయి. అయితే ఆందోళన విరమణకు తెలంగాణ జెఎసి నిరాకరించింది.

కాగా, సీమాంధ్రలో సమైక్యాంధ్ర ఉద్యమాలు వెనక్కి తగ్గాయి. అఖిలపక్ష సమావేశం చేసిన విజ్ఞప్తి మేరకు సీమాంధ్రలో ఉద్యమాలు ఆపాలని రాజకీయ పార్టీల నాయకులు ప్రజలను, విద్యార్థులను కోరారు. ఈ నెల 10వ తేదీన హైదరాబాదులో తలపెట్టిన సమైక్యవాదుల సదస్సును వాయిదా వేసినట్లు సీమాంధ్ర జెఎసి కన్వీనర్ శైలజానాథ్ చెప్పారు. సంక్రాంతి పర్వదినం తర్వాత సమావేశం తేదీని నిర్ణయిస్తామని ఆయన గురువారం మీడియా ప్రతినిధులతో చెప్పారు.