18 గంటలుగా శ్రీనగర్ లో ఎదురు కాల్పులు

శ్రీనగర్: జమ్మూ కాశ్మీర్ లోని శ్రీనగర్ లో గత 18 గంటలుగా భద్రతా బలగాలకు, ఉగ్రవాదులకు మధ్య ఎదురు కాల్పులు జరుగుతున్నాయి. ఇద్దరు ఉగ్రవాదులతో భద్రతా బలగాలు తలపడుతున్నాయి. బుధవారం సాయంత్రం ప్రారంభమైన ఎదురు కాల్పులు బుధవారం రాత్రి కూడా కొనసాగాయి. ఈ ఎదురుకాల్పుల్లో ఒక పోలీసు మరణించగా, పది మంది గాయపడ్డారు. శ్రీనగర్ లోని లాల్ చౌక్ ప్రాంతంలోని చారిత్రాత్మకమైన అమీరా కాదల్ వంతెన సమీపంలో గల హోటల్లో ఇద్దరు ఉగ్రవాదులు ఉన్నారు. లోపలి నుంచి వారు భద్రతా బలగాలపైకి కాల్పులు జరుపుతున్నారు.

ఇద్దరు ఉగ్రవాదుల్లో ఒకతను స్థానికుడైన ఉస్మాన్ కాగా, మరొకతను పాకిస్తానీ అని తెలుస్తోంది. 2007 అక్టోబర్ నుంచి శ్రీనగర్ లో ఇది తొలి ఫిదాయీ దాడి. ఉగ్రవాదులు సిఆర్పిఎఫ్ అధికారులను లక్ష్యంగా చేసుకుని పికెట్ పై దాడి చేశారు. ఈ దాడిలో ఒక పోలీసు మరణించాడు. వెంటనే భద్రతా బలగాలు కాల్పులు జరిపాయి. హోటళ్లోకి వెళ్లి ఉగ్రవాదులు భద్రతా బలగాలపైకి కాల్పులు జరుపుతున్నారు.