కోడిపందేలకు రంగం సిద్ధం, పోలీసుల బ్రేకులు

విజయవాడ: సంక్రాంతి సందర్భంగా వేలం వెర్రిగా సాగే కోడిపందాలకు పోలీసు అధికారులు బ్రేకులు వేశారు. సంక్రాంతి కోడి పందాల నిర్వహణకు ప్రాంగణాలు సిద్ధమవుతున్నాయి. అయితే ఈసారి మాత్రం పందాలను అడ్డుకుంటామని ఏలూరు రేంజ్‌ డీఐజీ ఎంఎం భగవత్‌ చెప్పారు. జిల్లాలోని నూజివీడు, శోభనాపురం, ఇబ్రహీంపట్నం, మైలవరం, పశ్చిమ గోదావరి జిల్లా భీమవరం, చింతలపూడి, తూర్పు గోదావరి జిల్లా రాజమండ్రి తదితర ప్రాంతాలు పందాలకు సిద్ధమవుతున్నాయి. ఇక్కడ వందల కోట్ల రూపాయలలో పందాలు జరుగుతాయి. ఇతర రాష్ట్రాలు, దేశాలలో స్థిరపడిన కృష్ణా, ఉభయ గోదావరి జిల్లాలకు చెందిన వారు సంక్రాంతి పందాల కోసం గోనె సంచుల డబ్బుతో సొంత ఊళ్లకు వచ్చేస్తున్నారు.

పందాలు నిర్వహించే సుమారు 300 మందిని కృష్ణా, పశ్చిమ, తూర్పు గోదావరి జిల్లాల్లో ఇప్పటికే బైండోవర్‌ చేశామని భగవత్ చెప్పారు.గత ఏడాది భీమవరంలో భారీ ఎత్తున పందెం నిర్వహించిన అబ్బాయిరాజును కూడా బైండోవర్‌ చేశామని తెలిపారు. సంక్రాంతి వరకు బైండోవర్‌ అయిన కత్తుల తయారీదారులు, కోడి కత్తులు కట్టేవారు, పందాల నిర్వాహకులు సంబంధిత స్టేషన్లకు వెళ్లి విధిగా సంతకాలు పెట్టాల్సి ఉందన్నారు.