తమిళనాడు పోలీసు సూపర్ బాస్ గా మహిళ

చెన్నై: తమిళనాడు రాష్ట్ర పోలీసు సూపర్ బాస్‌గా మహిళా అధికారి లతికా శరణ్‌ నియామకమయ్యారు. రాష్ట్రంలో తొలి మహిళా డీజీపీగా రికార్డు సృష్టించారు. 2006లో చెన్నై తొలి మహిళా కమిషనర్‌గా బాధ్యతలు చేపట్టినప్పుడూ ఆమెది రికార్డే. డీఎంకే ప్రభుత్వం మహిళలకు అగ్రతాంబూలం ఇస్తుందనే ప్రచారంలో భాగంగానే సీఎం కరుణానిధి లెతికాకు ఉన్నత స్థానం కట్టబెట్టినట్లు తెలుస్తోంది. 2006లో హోంశాఖ కార్యదర్శిగా మహిళా అధికారి ఎస్‌.మాలతికి అవకాశం ఇచ్చారు.

ప్రస్తుత డీజీపీ కేపీ జైన్‌ పదవీకాలం మరో మూడున్నర నెలలు మిగిలి ఉండగానే.. ఆయన దీర్ఘకాలిక సెలవుపై వెళ్లడానికి నిర్ణయించుకోవడంతో కొత్త డీజీపీ నియామక చేపట్టటం చేపట్టారు. తిరునల్వేలి జిల్లాలో పట్టపగలు ఇద్దరు మంత్రుల సమక్షంలో ఓ ఎస్‌.ఐ. దారుణ హత్యకు గురైన సంఘటన నేపథ్యంలో డీజీపీ సెలవుపై వెళ్తున్నట్లు వెలువడిన ఊహాగానాలను ఆయన ఖండించారు. ఇది మామూలుగా పెట్టిన సెలవేననీ, ప్రభుత్వం అనుమతి ఇచ్చిందని వివరించారు. ఈ నిర్ణయం వెనక ఇతరత్రా కారణాలేవైనా ఉన్నాయా అనే ప్రశ్నకు సమాధానం ఇచ్చేందుకు జైన్‌ తిరస్కరించారు.