మంత్రులకు జెఎసి అడ్డంకులు, బస్సులో తరలింపు

వరంగల్: తెలంగాణవాదులు ప్రతిగ్రామంలో అడ్డుపడే సూచనలు కనిపించడంతో మంత్రులు పొన్నాల లక్ష్మయ్య, రాంరెడ్డి వెంకటరెడ్డిలను పోలీసు అధికారులు మేడారం నుంచి బస్సులో రహస్యంగా తరలించారు ములుగు, పస్రాలో జరిగిన ఘటనలతో పోలీసులు మంత్రుల వాహనాలను ముందుగా పంపించారు. ఆ తర్వాత ఎవరికి అనుమానం రాకుండా మంత్రులను బస్సులో తరలించినట్లు సమాచారం. మేడారం వెళ్ళే దారిలో మంత్రులను జెఎసి నేతలు అడ్దుకున్నారు. పోలీసుల జోక్యంతో మంత్రుల కార్లు ముందుకు సాగాయి.

ఈ సందర్భంగా మంత్రులు వాహనాలు దిగి జై తెలంగాణ అంటూ నినాదాలు చేశారు. తమలో కూడా తెలంగాణ రక్తమే ప్రవహిస్తోందని, తెలంగాణ రాష్ట్ర ఏర్పాటు కోసం పూర్తి స్థాయిలో కృషి చేస్తున్నామని స్పష్టం చేశారు. ఇంతలో పోలీసు అధికారులు జేఏసీ నాయకులకు నచ్చజెప్పి మంత్రులను మేడారం పంపించారు. వాహనాలకు అడ్డుపడిన వారిలో జేఏసీ నాయకులు ఎంపీపీ మస్రగాని వినయ్‌కుమార్‌, నల్లెల్ల కుమారస్వామి, గరిగె రఘు, గోవింద్‌నాయక్‌, లకణ్‌నాయక్‌, ఓడ రాజు, అలీ, రవి తదితరులు ఉన్నారు.