విశాఖలో 20 నుంచి జిల్లాల వారీ ప్రజారాజ్యం సమీక్షలు

ఉప్పలగుప్తం : ప్రజారాజ్యం పార్టీ ఆవిర్భావం నుంచి ఎదురవుతున్న ఒడిదుడుకుల పై పార్టీ అధినేత చిరంజీవి దృష్టి సారించినట్టు రాష్ట్ర ప్రధాన కార్యదర్శి రవణం స్వామినాయుడు తెలిపారు. ఆదివారం ఉప్పలగుప్తం వచ్చిన ఆయన స్థానిక విలేకర్లతో మాట్లాడారు. గ్రామస్థాయి నుంచి పార్టీని బలోపేతం చేసేందుకు ప్రత్యేక కార్యాచరణ రూపొందించామని తొలుత జిల్లాల వారీగా సమీక్షలు నిర్వహించి జిల్లానాయకత్వాలను పటిష్టపర్చనున్నట్టు చెప్పారు. ఈ నెల 20న విశాఖపట్నంలో జిల్లాల వారీగా సమీక్షలు నిర్వహిస్తున్నామన్నారు. పార్టీ అధినేత చిరంజీవి ఆధ్వర్యంలో ఈ సమీక్షలు జరుగుతాయన్నారు. సమీక్షలలో ప్రధానంగా సమైక్యాంధ్ర కోసం అభిప్రాయ సేకరణ జరుగుతుందని చెప్పారు.

పార్టీలో అంతర్గత విభేదాలను పారదోలే విషయంపై చర్చ జరుగుతుందని రవణం స్వామినాయుడు తెలిపారు. జిల్లా పార్టీ అధ్యక్షులు, రాష్ట్ర పార్టీ సభ్యులు, చిరంజీవి అభిమాన సంఘాల నాయకులు ఈ సమీక్షలో పాల్గొంటారని తెలిపారు. రాబోయేరోజుల్లో పార్టీని మరింత బలోపేతం చేసేందుకు పార్టీ అధ్యక్షుడు చిరంజీవి ఈ సమీక్షలు నిర్వహిస్తున్నట్టు స్వామినాయుడు తెలిపారు. కార్యకర్తలు, నాయకులు సమావేశాలకు హాజరు కావాలని ఆయన కోరారు.