ఓయూ విద్యార్ధి ఆత్మహత్యతో వేడెక్కిన కెయు క్యాంపస్

వరంగల్‌: ఉస్మానియా యూనివర్సిటీలో తెలంగాణ రాష్ట్రం కోసం వేణుగోపాలరెడ్డి అనే విద్యార్ధి ఆత్మహత్య చేసుకోవడంతో వరంగల్ కాకతీయ యూనివర్సిటీ క్యాంపస్ వేడెక్కింది. వరంగల్‌ లోని కేయూ విద్యార్ధులు వీసీ కార్యాలయాన్ని మంగళవారం ఉదయం ముట్టడించారు. పరీక్షలు వాయిదా వేయాలని డిమాండ్‌ చేస్తూ ఆందోళన నిర్వహించారు. ఓయూలో విద్యార్థి వేణుగోపాల్‌రెడ్డి ఆత్మహత్యకు సంతాపంగా వరంగల్‌ బంద్‌కు విద్యార్థి జేఏసీ పిలుపునిచ్చింది. అలాగే వరంగల్‌లో పాదయాత్ర చేస్తున్న సుమారు 200 మంది యువకులు కూడా విద్యార్ధులకు మద్ధతుగా కేయూ చేరుకున్నారు.

కాగా తెలంగాణ రాదేమోనన్న దిగులుతో ఆత్మహత్యలకు పాల్పడుతున్న సంఘటనలు వరంగల్ జిల్లాలో అనేక చోట్ల జరుగుతున్నాయి. నిన్న వరంగల్ నగరంలోనే ఈ సంఘటన జరిగింది. తెలంగాణ రాష్ట్ర ప్రక్రియ ఆలస్యమవుతుందనే మనస్తాపంతో నగరంలోని దేశాయిపేటకు చెందిన ఓ వ్యక్తి కిరోసిన్‌ పోసుకుని నిప్పు అంటించుకుని ఆత్మహత్యాయత్నానికి పాల్పడిన సంఘటన సోమవారం జరిగింది. గ్రామస్తుల కథనం ప్రకారం వివరాలిలా ఉన్నాయి. ఈ గ్రామానికి చెందిన సంగినేని శంకర్‌(30) శరీరంపై కిరోసిన్‌ పోసుకుని నిప్పు అంటించుకున్నాడని భార్య లావణ్య తెలిపింది.