మారమ్రోగిన ఎబివిపి తెలంగాణ రణభేరీ

హైదరాబాద్: హైదరాబాదులోని నిజాం కళాశాల మైదానం శనివారం తెలంగాణ నినాదాలతో మారుమ్రోగింది. తెలంగాణ రాష్ట్ర ఏర్పాటును డిమాండ్ చేస్తూ ఎబివిపి శనివారం నిజాం కళాశాల మైదానంలో తెలంగాణ రణభేరీ పేరుతో భారీ బహిరంగ సభను నిర్వహించింది. ఈ సభకు బిజెపి సీనియర్ సుష్మా స్వరాజ్, నాయకుడు ప్రకాష్ జవేదకర్ హాజరయ్యారు. తెలంగాణ రాష్ట్ర ఏర్పాటుకు వారు తమ పూర్తి మద్దతు ప్రకటించారు. అశేష విద్యార్థిలోకాన్ని ఉద్దేశించి వారు ప్రసంగించారు. నిజాం కళాశాల మైదానం విద్యార్థిలోకంతో క్రిక్కిరిసిపోయింది.

ఎబివిపి రణభేరికి హైకోర్టు షరతులతో కూడిన అనుమతి ఇచ్చింది. విద్యార్థులు తప్ప మరొకరిని సభకు అనుమతించకూడదని ఆదేశించింది. విద్యార్థులు తమ గుర్తింపు కార్డులు చూపి లోనికి ప్రవేశించాల్సి ఉంటుందని నిబంధన పెట్టింది. గుర్తింపు కార్డులు లేకుండా అనుమతించాలని ఎబివిపి చేసిన విజ్ఞప్తిని హైకోర్టు తోసిపుచ్చింది.వివిధ జాతీయ నాయకులు వేషాల్లో విద్యార్థులు వేదిక మీదకి వచ్చారు. తెలంగాణ అమరవీరులకు సుష్మా స్వరాజ్ శ్రద్ధాంజలి ఘటించారు.