ఆత్మహత్యలను కించపరచకండి: కోదండరామ్

హైదరాబాద్‌: ప్రత్యేక తెలంగాణతో ముడిపడిన ఆత్మహత్యలను అగౌరవ పరిచేలా మాట్లాడవద్దని సీమాంధ్ర నేతలకు తెలంగాణ పొలిటికల్‌ జేఏసీ కన్వీనర్‌ ప్రొఫెసర్‌ కోదండరామ్‌ విజ్ఞప్తి చేశారు. వేణుగోపాల్‌రెడ్డి ఆత్మహత్యపై లేనిపోని రాద్ధాంతం సృష్టించేందుకు ప్రయత్నిస్తున్నారని ఆయన విమర్శించారు. ఆంధ్రప్రాంతానికి చెందిన కొందరు నాయకులు వేణుగోపాల్ రెడ్డిది హత్యేనన్న అనుమానాలు వ్యక్తం చేస్తున్నారు. దీనిపై ఉన్నత స్ధాయి పోలీసు విచారణ కూడా సాగుతోంది.

ఉస్మానియా విశ్వవిద్యాలయంలో ఆత్మాహుతి చేసుకున్నాడని చెబుతున్న ఎంసిఎ విద్యార్ధి వేణుగోపాల్ రెడ్డి మరణంపై అనుమానాలు ఉన్నాయని పీఆర్పీ సీనియర్ నాయకుడు కోటగిరి విద్యాధరరావు అన్నారు. శనివారం ఆయన మీడియాతో మాట్లాడుతూ తెలంగాణ ఉద్యమంలో ఎంతోమంది మృతిచెందారని అయితే ఎవరిపైనా రాని అనుమానాలు వేణుగోపాల్‌ రెడ్డి మృతిపైనే ఎందుకు వస్తున్నాయని ప్రశ్నించారు. అనుమానాలను నివృత్తి చేయాల్సిన బాధ్యత ప్రభుత్వంపైనే ఉందన్నారు. పోలీసులు అన్నికోణాలనుంచి దర్యాప్తు జరపాలని డిమాండ్‌ చేశారు.