తెలుగుజాతి సంతోషంగా ఉంటుంది: డిఎస్

హైదరాబాద్‌: రాబోయే రోజుల్లో తెలుగుజాతి సంతోషంగా ఉంటుందని పీసీసీ అధ్యక్షుడు డి. శ్రీనివాస్‌ ప్రకటించారు. ఢిల్లీ పర్యటన ముగించుకొని డీఎస్‌ ఆదివారం హైదరాబాద్‌కు చేరుకున్నారు. ఈ సందర్భంగా ఆయన మీడియాతో మాట్లాడుతూ, 'జరగాల్సినవి జరుగుతాయి. తెలుగు జాతి సంతోషంగా ఉంటుంది,' అని అన్నారు. ఏఐసీసీ అధ్యక్షురాలు సోనియాగాంధీకి పీసీసీ చీఫ్‌గా అన్ని విషయాలు వివరించానని తెలిపారు.

డిఎస్ మాటల్లోని అంతరార్ధం తెలియక మీడియా ప్రతినిధులు ఎవరికి వారు తమకు అనుకూలంగా అన్వయించుకోవడం కన్పించింది. హైదరాబాద్ ను కేంద్రపాలిత ప్రాంతంగా ప్రకటించి తెలంగాణకు ఒక రాజధానిని, ఆంధ్రకు మరో రాజధానిని ప్రకటించే అవకాశమున్నట్టు ఒక అభిప్రాయం బలంగా విన్పిస్తోంది. అయితే డిఎస్ చెప్పినదాని ప్రకారం కొంతకాలం కొన్ని హామీలతో సమైక్యాంధ్ర కొనసాగుతుందా అన్న అనుమానాలు కూడా తలెత్తుతున్నాయి.