విజయవాడలో హైటెక్ సిటీ: రోశయ్య ప్రారంభోత్సవం

విజయవాడ: రాష్ట్రంలో రెండో 'హైటెక్‌ సిటీ' ప్రారంభోత్సవానికి సిద్ధమైంది. కృష్ణా జిల్లా గన్నవరం మండలంలోని కీసరపల్లిలో ఎల్‌ అండ్‌ టి సంస్థ ఈ హైటెక్‌ సిటీని అభివృద్ధి చేసింది. 'ఎల్‌ అండ్‌ టి హైటె క్‌ సిటీ'ని ముఖ్యమంత్రి కె రోశయ్య గురువారం ప్రారంభించనున్నారు. ఆంధ్రప్రదేశ్‌ పారిశ్రామిక మౌలిక సదుపాయాల కల్పనా సంస్థ ఈ ప్రాజెక్టు కోసం 30 ఎకరాలు కేటాయించింది. ఈ ప్రాజెక్టులో ఎల్‌ అండ్‌ టికి 74శాతం ఉండగా, ఎపిఐఐసికి 20శాతం వాటా ఉంది. ఈ ప్రాజెక్టును మొత్తం రూ.450 కోట్ల వ్యయంతో అభివృద్ధి చేయాలని నిర్ణయించారు. ఈ ప్రాజెక్టుకు ప్రత్యేక ఆర్థిక మండలి(సెజ్‌) హోదా కల్పించారు.

ఈ ప్రాజెక్టు ఎప్పుడో సిద్ధం కావాల్సి ఉన్నా...గన్నవరం విమానాశ్రయానికి ఈ స్థలం చేరువలో ఉండటంతో హైటెక్‌ సిటీ భవనం ఎత్తు విషయంలో ఎయిర్‌పోర్ట్సు అథారిటీ ఆఫ్‌ ఇండియా (ఏఏఐ) అభ్యంతరాలు వ్యక్తం చేసింది. దీంతో విమానాశ్రయానికి ఎలాంటి ఇబ్బందులు తలెత్తకుండా ఎల్‌ అండ్‌ టి ఎత్తును తగ్గించింది. హైటెక్‌ సిటీలో రెండు సంస్థలకు ఆఫీసు స్థలం కేటాయించారు. ఎక్స్‌ట్రాంట్‌ సాఫ్ట్‌వేర్‌ సొల్యూషన్స్‌ సంస్థకు 50 వేల చదరపు అడుగుల స్థలం కేటాయించగా ఆ కంపెనీ తన కార్యకలాపాలు ప్రారంభించింది. టెక్‌ట్రాక్‌ ప్రైవేట్‌ లిమిటెడ్‌కు మరో 25 వేల చదరపు అడుగుల స్థలం కేటాయించారు.