రష్యన్ బాలిక రేప్ కేసులో ఒకరి అరెస్టు

న్యూఢిల్లీ: రష్యన్ బాలిక రేప్ కేసులోని ఇద్దరు అనుమానితుల్లో ఒకడ్ని గోవా పోలీసులు అరెస్టు చేశారు. తొమ్మిదేళ్ల రష్యన్ బాలికపై అత్యాచారం కేసులో పేర్నెం బస్సు స్టాపులో అనిల్ రఘువంశి అనే వ్యక్తిని పోలీసులు అరెస్టు చేశారు. మరో నిందితుడు అమన్ భరద్వాజ కోసం పోలీసులు గాలిస్తున్నారు. అరంబోల్ బీచ్ లో ఈ నెల 26వ తేదీన రష్యన్ బాలికను రేప్ చేసినట్లు పోలీసులకు ఫిర్యాదు అందింది. దాంతో పోలీసులు నిందితుల ఫొటోలను విడుదల చేశారు.

బాధితురాలు, ఆమె తల్లి ఫొటోలో ఉన్న వ్యక్తి నేరానికి పాల్పడినట్లు ధ్రువీకరించారు. మరో నిందితుడు భరద్వాజ్ ధర్గాల్ పారిశ్రామికవాడలో ఫార్మాస్యూటికల్ కంపెనీలో మిషన్ ఆపరేటర్ గా పనిచేస్తున్నాడు. అతను విధులకు హాజరు కావడం లేదని, పరారీలో ఉన్నాడని డిప్యూటీ ఇన్ స్పెక్టర్ జనరల్ రవీంద్ర యాదవ్ చెప్పారు.