లక్ష్మీప్రణతితో జూనియర్ ఎన్టీఆర్ పెళ్లి

హైదరాబాద్: జూనియర్ ఎన్టీఆర్ పెళ్లి కుదిరింది. పెళ్లి కూతురు తెలుగుదేశం పార్టీ అధ్యక్షుడు నారా చంద్రబాబు నాయుడి మేనకోడలి కూతురు లక్ష్మీ ప్రణతి. ఇటీవలే ఎన్టీఆర్ తన తల్లిదండ్రులు శాలిని, హరికృష్ణలతో కలిసి పెళ్లి చూపులకు వెళ్లి వచ్చినట్లు వార్తా కథనాలు ప్రచురితమయ్యాయి.లక్ష్మీ ప్రణతి చంద్రబాబు పెద్ద చెల్లెలు రాజేశ్వరి మనవరాలు. ఆమె తల్లిదండ్రులు మల్లిక, నార్నే శ్రీనివాస రావు. నార్నే శ్రీనివాస రావు రియల్ ఎస్టేట్ వ్యాపారి. ఆయనకు ఓ టీవి చానెల్ కూడా ఉంది. జూనియర్ ఎన్టీఆర్, లక్ష్మీప్రణతి వివాహానికి త్వరలోనే నిశ్చితార్థం జరగనుంది. మేలో గానీ జూన్ లో గానీ జరగవచ్చునని భావిస్తున్నారు. నాలుగు రోజుల క్రితం వివాహం ఖరారైంది.

వివాహం ఖరారు చేసుకోవడానికి చంద్రబాబు భార్య భువనేశ్వరి, బాలకృష్ణ భార్య వసుంధర, ఎన్టీఆర్ సోదరులు కల్యాణ్ రామ్, జానకీరామ్, మరికొందరు సన్నిహితులు నార్నే శ్రీనివాస రావు నివాసానికి వెళ్లారు. ఎన్టీఆర్ కుటుంబ సభ్యులతో చంద్రబాబుకు ఇది మూడవ బంధం. తాను మంత్రిగా ఉండగా ఎన్టీఆర్ కూతురు భువనేశ్వరిని చంద్రబాబు వివాహం చేసుకున్నారు. ఆ తర్వాత ఎన్టీఆర్ కుమారుడు బాలకృష్ణ కూతురు ప్రణతికి తన కుమారుడు లోకేష్ ను చేసుకున్నాడు. ఇప్పుడు జూనియర్ ఎన్టీఆర్ కు తన కుటుంబానికే చెందిన లక్ష్మీప్రణతితో వివాహం ఖరారు చేశారు. తెలుగుదేశం పార్టీపై, ఎన్టీఆర్ వారసత్వంపై తన కుటుంబ సభ్యుల పట్టు కోసం చంద్రబాబు ఈ వివాహ బంధాలను పకడ్బందీగా ఏర్పాటు చేసుకున్నట్లు ప్రచారం జరుగుతోంది.