తెలంగాణ వస్తుంది: సారయ్య విశ్వాసం

హైదరాబాద్: తెలంగాణ రాష్ట్రం ఏర్పడుతుందని తనకు పూర్తి విశ్వాసం ఉందని కాంగ్రెసు తెలంగాణ కార్యాచరణ కమిటీ కన్వీనర్ బస్వరాజు సారయ్య అన్నారు. కాంగ్రెసు సీనియర్ శాసనసభ్యుడు కె. జానా రెడ్డితో కలిసి ఆయన శుక్రవారం ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్ ను కలిశారు. రాష్ట్ర ఏర్పాటుకు కమిటీ ఏర్పాటు చేస్తామని చిదంబరం ప్రకటన వెలువడిన తర్వాత ఇక డెడె లైన్లు, రాజీనామాలు ఎందుకని శ్రీనివాస్ వారిని అడిగినట్లు సమాచారం. డెడ్ లైన్లతో పనేమిటని పార్టీ అధిష్టానం తనను అడుగుతోందని డి. శ్రీనివాస్ తమతో అన్నట్లు సారయ్య చెప్పారు. రాజీనామాలు, డెడ్ లైన్లతో ఇక పనేమిటని కూడా అడిగిట్లు ఆయన తెలిపారు.

డెడ్ లైన్లు, రాజీనామాలు లేకుండా తెలంగాణ జెఎసిని ఒప్పించాలని శ్రీనివాస్ తమకు సూచించినట్లు ఆయన తెలిపారు. తమకు తమ పార్టీ అధిష్టానంపై పూర్తి విశ్వాసం ఉందని ఆయన చెప్పారు. తాజా పరిణామాలపై కాంగ్రెసు తెలంగాణ నాయకులు రేపు సమావేశమై చర్చిస్తారని ఆయన చెప్పారు. తాము అధిష్టానానికి చెందిన వీరప్ప మొయిలీ, ప్రణబ్ ముఖర్జీ తదితరులతో మాట్లాడామని, వారితో మాట్లాడిన తర్వాత తమకు తెలంగాణపై పూర్తి విశ్వాసం కలిగిందని ఆయన చెప్పారు.