ఎన్టీఆర్ నిశ్చితార్థంపై పిటిషన్ కొట్టివేత

మచిలీపట్నం: ప్రముఖ సినీ నటుడు జూనియర్ ఎన్టీఆర్ వివాహంపై దాఖలైన పిటిషన్ ను లీగల్ సర్వీసెస్ అథారిటీ శనివారంనాడు కొట్టేసింది. ఎన్టీఆర్ మైనారిటీ తీరని లక్ష్మీప్రణతిని వివాహం చేసుకుంటున్నాడని ఆరోపిస్తూ మచిలీపట్నానికి చెందిన శాంతిప్రసాద్ అనే న్యాయవాది లీగల్ సర్వీసెస్ అథారిటీలో పిటిషన్ వేశారు. దీంతో లీగల్ సర్వీసెస్ అథారిటీ జూనియర్ ఎన్టీఆర్ కు, తెలుగుదేశం పార్టీ అధ్యక్షుడు నారా చంద్రబాబు నాయుడికి, లక్ష్మీప్రణతికి శుక్రవారం నోటీసులు జారీ చేసింది.

లక్ష్మీప్రణతితో జూనియర్ ఎన్టీఆర్ పెళ్లికి సంబంధించిన మాటా ముచ్చట జరిగిందే తప్ప నిశ్చితార్థం జరగలేదు. లక్ష్మీప్రణతికి ఈ ఏడాది మార్చి 28వ తేదీతో 18 ఏళ్ల వయస్సు దాటుతుంది. దీంతో ఆమె మైనారిటీ దాటి మైజర్ అవుతుంది. వివాహం కూడా ఈ ఏడాది మేలో జరుగుతుందని అంటున్నారు. అందువల్ల వయస్సుకు సంబంధించిన అంశాన్ని దృష్టిలో పెట్టుకునే జూనియర్ ఎన్టీఆర్, లక్ష్మీప్రణతిల వివాహ కార్యక్రమాలు పెట్టుకుంటున్నట్లు అర్థమవుతోంది.