తెలంగాణపై డెడ్ లేన్లు వృధా: నారాయణ

కరీంనగర్: డెడ్ లైన్లు, రాజీనామాలతో తెలంగాణ రాదని సిపిఐ రాష్ట్ర కార్యదర్శి కె. నారాయణ అన్నారు. ధరల పెరుగుదలకు వ్యతిరేకంగా పార్టీ చేపట్టిన కలెక్టరేట్ ముట్టడిలో పాల్గొనడానికి వచ్చిన ఆయన సోమవారం మీడియా ప్రతినిధుల సమావేశంలో మాట్లాడారు. కాంగ్రెసు కపట నాటకం వల్లనే రాష్ట్రంలో ప్రాంతీయ వాదాలు చోటు చేసుకున్నాయని, తెలంగాణ వాదాన్నీ సమైక్యావాదాన్నీ పుట్టించింది కాంగ్రెసు పార్టీయేనని ఆయన అన్నారు.

రాజ్యాంగ సంక్షోభం సృష్టించడం వల్ల తెలంగాణ రాదని, రాజకీయ ప్రక్రియ ద్వారా మాత్రమే వస్తుందని ఆయన అన్నారు. తెలంగాణ విషయంలో పార్టీలు అవకాశవాదానికి పూనుకుంటున్నాయని ఆయన విమర్శించారు. గనుల మాఫియా బలోపేతమై ప్రజాస్వామ్యానికి సవాల్ విసురుతోందని ఆయన అన్నారు. తాడి చెర్ల బొగ్గుగనులను ప్రైవేట్ వారికి ఇవ్వవద్దని ఆయన డిమాండ్ చేశారు. సిపిఐ తలపెట్టిన కలెక్టరేట్ ముట్టడి ఉద్రిక్తతకు దారి తీసింది. అనుమతి లేకుండా వేసిన టెంట్లను పోలీసులు తొలగించారు. పోలీసులతో సిపిఐ కార్యకర్తలు వాగ్వివాదానికి దిగారు. దీంతో ఉద్రిక్త వాతావరణం నెలకొంది.