వైష్ణవి కేసు: రంగంలోకి దిగిన 2 వేలమంది పోలీసులు

రాష్ట్ర వ్యాప్తంగా సంచలనం కలిగించిన వైష్టవి కిడ్నాప్‌, హత్యల కేసులో మిస్టరీని ఛేదించేందుకు నగర పోలీసులు సమగ్ర దర్యాప్తు చేశారు. చిన్నారి ప్రాణాన్ని కాపాడలేకపోయినప్పటికీ మిస్టరీని ఛేదించడానికి ముమ్మరంగా యత్నించారు. పోలీస్‌ కమిషనర్‌ రాజేంద్రనాథ్‌రెడ్డితోపాటు గుంటూరు జిల్లా ఎస్‌పీ స్వయంగా ఈ కేసు పరిశోధనలో పాల్గొన్నారు. విజయవాడలోని డ్రైవర్‌ హత్యా ప్రదేశం నుంచి గుంటూరు జిల్లా తాడేపల్లి ప్రాంతంలో పోలీసు జాగిలాలతో సీపీ స్వయంగా తనిఖీలు నిర్వహించారు.

విజయవాడ, గుంటూరుకు చెందిన రెండువేల మంది రిజర్వు పోలీసులు ఇల్లిల్లూ తనిఖీ చేశారు. మూడు వందల మందికి పైగా రౌడీషీటర్లను విచారణ చేస్తూనే పలగాని కుటుంబ కలహాలపై కూడా దృష్టి కేంద్రీకరించారు. తొమ్మిది సెల్‌ కంపెనీల నెట్‌వర్క్‌ కేంద్రాల సహాయాన్ని తీసుకుని ఆదివారం రాత్రి 1.50 లక్షల కాల్స్‌ను పరిశీలించారు. హత్య జరిగిన ప్రదేశం నుంచి గుంటూరు జిల్లా ఆటోనగర్‌ వరకు మార్గమధ్యలో ఉన్న సెల్‌ టవర్ల మీద మాట్లాడిన వినియోగదారుల వివరాల జాబితాను సేకరించారు.

ఆ జాబితాలో లభ్యమైన ఒక నంబరు నుంచి సంఘటన జరిగిన సమయంలో (8.30 నుంచి 9.30 గంటల వరకు) 130 కాల్స్‌ మాట్లాడినట్టు గుర్తించారు. నిందితుడైన శ్రీనివాసరావు నంబరుగా దానిని గుర్తించారు. ఈ నంబరు నుంచి శ్రీనివాసరావు వెంకట్రావ్‌కు ఫోన్‌ చేసినట్లుగా గుర్తించి అతన్ని అదుపులోకి తీసుకుని ప్రశ్నించడంతో కేసు మిస్టరీ వీడింది. ఈ సెల్‌ఫోన్‌ కాల్‌ కాకుండా కేసు మిస్టరీకి సంబంధించి పోలీసుల వద్ద మరో ముఖ్యమైన ఆధారం ఉన్నట్టుగా తెలుస్తోంది.