తెలంగాణ సమస్యకు కాంగ్రెసు కారణం: చంద్రబాబు నాయుడు

కాకినాడ: ప్రస్తుతం రాష్ట్రంలో నెలకొన్న సమస్యకు కారణం కాంగ్రెసు పార్టీయేనని, అందువల్ల సమస్యను పరిష్కరించాల్సిన బాధ్యత ఆ పార్టీ మీదనే ఉందని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. తమ పార్టీని దెబ్బ తీసేందుకు కాంగ్రెసు పార్టీ కుట్రలు చేస్తోందని ఆయన గురువారం మీడియా ప్రతినిధుల సమావేశంలో విమర్శించారు. కాంగ్రెసు పార్టీపై ఆయన తీవ్ర విమర్శలు చేశారు. రాష్ట్ర పరిస్థితులపై సంప్రదింపులకు కేంద్రం వేసిన శ్రీకృష్ణ కమిటీపై తానేమీ మాట్లాడబోనని ఆయన అన్నారు. రెండు ప్రాంతాల ప్రజల అభిప్రాయాలను గౌరవించాల్సిన అవసరం ఉందని ఆయన అభిప్రాయపడ్డారు. కాంగ్రెసు పార్టీ ప్రభుత్వం అన్ని రంగాల్లో విఫలమైందని ఆయన అన్నారు.

కాకినాడ ప్రభుత్వాస్పత్రిలో చికిత్స పొందుతున్న కల్తీసారా బాధితులను ఆయన గురువారం ఉదయం పరామర్శించారు. వారి ఆరోగ్యం గురించి, వారికి అందుతున్న చికిత్స గురించి ఆయన అడిగి తెలుసుకున్నారు. కోరమండల్ గ్యాస్ లీకేజీ బాధితులను కూడా ఆయన పరామర్శించారు. కల్తీ సారా ఘటనపై జ్యుడిషియల్ విచారణ జరిపించాలని ఆయన ప్రభుత్వాన్ని డిమాండ్ చేశారు. బెల్ట్ షాపులను ఇప్పటికైనా ఎత్తేయాలని కూడా ఆయన డిమాండ్ చేశారు.