ఇక హైదరాబాద్- విశాఖ మధ్య రోజూ ఎసి రైలు

హైదరాబాద్: సికింద్రాబాద్ - విశాఖపట్నంల మధ్య నడుస్తున్న గరీబ్ రథ్ రైలు నేటి నుంచి ప్రతి రోజూ నడుస్తుంది. గరీబ్ రథ్ రెండో రైలుకు గురువారం ఉదయం ముఖ్యమంత్రి కొణిజేటి రోశయ్య సికింద్రాబాద్ స్టేషన్ లో పచ్చ జండా ఊపి ప్రారంభించారు. ఈ రెండు నగరాల మధ్య గరీబ్ రథ్ ఇంతవరకూ రోజు విడిచి రోజు నడుస్తున్న విషయం తెలిసిందే. సామాన్యులకు కూడా ఎసి రైలు ప్రయాణం అందుబాటులో ఉండే విధంగా ఈ గరీబ్ రథ్ రైలు బోగీలన్నీ ఎయిర్ కండిషన్ వే కావడం విశేషం.

సికింద్రాబాద్ - పాట్నా ఎక్స్ ప్రెస్ కు కూడా ముఖ్యమంత్రి గురువారం ఉదయం పచ్చ జండా ఊపి ప్రారంభించారు. రైళ్ళ ప్రారంభోత్సవ కార్యక్రమంలో అనేక మంది మంత్రులు, పలువురు ఉన్నతాధికారులు పాల్గొన్నారు. అప్పటి రైల్వే మంత్రి లాలూ ప్రసాద్ ఆలోచన ఫలితమే గరీభ్ రథ్.