రిమోట్ విమాన తయారీదారు మృతి

హైదరాబాద్: రిమోట్ కంట్రోల్ తో మానవరహితంగా నడిచే విమానం నమూనాను రూపొందించిన ఇంజినీరింగ్ విద్యార్థులు ఇద్దరు గురువారం రోడ్డు ప్రమాదానికి గురయ్యారు. వారిలో అబ్దుల్ లతీఫ్ అనే విద్యార్థి అక్కడికక్కడే మరణించగా, అభిలాష్ అనే విద్యార్థి ఆస్పత్రిలో చికిత్స పొందుతున్నాడు. అభిలాష్ పరిస్థితి ఆందోళనకరంగానే ఉంది. వీరు ప్రయాణిస్తున్న బైక్ ను డిసిఎం వ్యాన్ ఢీకొట్టడంతో రంగారెడ్డి జిల్లా దుండిగల్ సమీపంలోని బషీరాబాద్ వద్ద ఈ ప్రమాదం సంభవించింది.

వారిద్దరు దుండిగల్ లోని మల్లారెడ్డి ఇంజినీరింగ్ కళాశాలలో ఏరోనాటికల్ విద్యార్థులు. వీరిద్దరు కలిసి రిమోట్ తో మనుషులు లేకుండా నడిచే విమానాన్ని రూపొందించి ప్రయోగించారు. రిమోట్ తో ఎగిరే విమానాన్ని వారు 80 వేల రూపాయలతో రూపొందించారు. ఆర్థిక సాయం అందితే చిన్నపాటి విమానాన్ని తయారు చేయాలనేది వారి కల. లతీఫ్ ది హైదరాబాదులోని మలక్ పేట కాగా, అభిలాష్ ది రంగారెడ్డి జిల్లాలోని తాండూరు.