త్వరలోనే విధివిధానాలు ఖరారు: దుగ్గల్

న్యూఢిల్లీ: ఆంధ్రప్రదేశ్ పరిస్థితిపై సంప్రదింపులకు ఏర్పాటు చేసిన జస్టిస్ శ్రీకృష్ణ కమిటీ విధివిధానాలు త్వరలోనే ఖరారు చేస్తామని కమిటీ మెంబర్ సెక్రటరీ, కేంద్ర హోం శాఖ మాజీ కార్యదర్శి వికె దుగ్గల్ చెప్పారు. ఆయన గురువారంనాడు కేంద్ర న్యాయశాఖ మంత్రి వీరప్ప మొయిలీతో, కేంద్ర హోం మంత్రి పి. చిదంబరంతో సమావేశమయ్యారు. కమిటీ విధివిధానాలు చర్చించేందుకే హోం మంత్రితో సమావేశమైనట్లు భేటీ అనంతరం దుగ్గల్ మీడియా ప్రతినిధులతో చెప్పారు. విధివిధానాలు ఖరారైన తర్వాతనే కమిటీ తొలి సమావేశం జరుగుతుందని ఆయన అన్నారు.

ముంబైలో ఉన్న జస్టిస్ శ్రీకృష్ణ ముంబైలోనే ఉన్నారు. ముంబై వెళ్లి శ్రీకృష్ణతో సమావేశమై విధివిధానాలు ఖరారు చేయాల్సిందిగా కేంద్ర మంత్రులు దుగ్గల్ కు సూచించినట్లు సమాచారం. ఇప్పుడిప్పుడే తాను ఢిల్లీ రావడానికి కుదరదని శ్రీకృష్ణ చెప్పినట్లు తెలిసింది. తనకు కొన్ని పనులున్నాయని, ఆ పనులు పూర్తయ్యే వరకు ఢిల్లీలో ఉండడానికి వీలు కాదని ఆయన చెప్పినట్లు తెలుస్తోంది. తాను ముంబై నుంచి పనిచేస్తానని కూడా ఆయన తెలిపినట్లు చెబుతున్నారు. అయితే ముంబై నుంచి పనిచేయడం సాధ్యం కాదని కేంద్ర మంత్రులు ఆయనతో అన్నట్లు సమాచారం.