కెసిఆర్ తో కాంగ్రెసు నేతల భేటీ

హైదరాబాద్: కాంగ్రెసు నేతలు ఆర్ దామోదర్ రెడ్డి, కెఆర్ అమోస్, యాదవ రెడ్డి బుధవారం తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో సమావేశమయ్యారు. ముఖ్యమంత్రి కె. రోశయ్యపై విమర్సలు చేస్తూ, శాసనసభా సమావేశాలను అడ్డుకుంటామని ప్రకటనలు చేస్తున్న దామోదర్ రెడ్డి కెసిఆర్ ను కలుసుకోవడం ప్రాధాన్యాన్ని సంతరించుకుంది. శ్రీకృష్ణ కమిటీ విధివిధానాల వెల్లడిలో జాప్యం జరుగుతున్న దృష్ట్యా కూడా ఈ సమావేశం ప్రాధాన్యం సంతరించుకున్నట్లు భావిస్తున్నారు. గత కొద్ది రోజులుగా ఆర్ దామోదర్ రెడ్డి ముఖ్యమంత్రి కె. రోశయ్యపై తీవ్ర విమర్శలు చేస్తున్నారు. తెలంగాణ పట్ల రోశయ్య పక్షపాతంతో వ్యవహరిస్తున్నారని ఆయన విమర్శిస్తున్నారు.

అయితే, ఈ సమావేశానికి ప్రత్యేకత ఏమీ లేదని తెరాస వర్గాలంటున్నాయి. జెఎసిలో కాంగ్రెసు కూడా ఉంది కాబట్టి ఆ వ్యవహారాల గురించి మాట్లాడడానికి వచ్చి ఉంటారని అంటున్నారు. శ్రీకృష్ణ కమిటీ విధివిధానాలపై రకరకాలైన ఊహాగానాలు ప్రచారమవుతున్నాయని, ఈ నెల 20వ తేదీ వరకు విధివిధానాలను ప్రకటించకూడదని ముఖ్యమంత్రి రోశయ్య కేంద్రాన్ని కోరినట్లు చెబుతున్నారని, ఈ స్థితిలో జెఎసి కార్యాచరణపై కాంగ్రెసు నాయకులు కెసిఆర్ తో మాట్లాడడానికి వచ్చి ఉంటారని ఆయన అన్నారు.