బడ్జెట్ అసెంబ్లీ సమావేశాలు సాగేనా?

హైదరాబాద్: శాసనసభ బడ్జెట్ సమావేశాలు సజావుగా సాగుతాయా అనే అనుమానాలు వ్యక్తమవుతున్నాయి. శ్రీకృష్ణ కమిటీ విధివిధానాలు తెలంగాణకు అనుకూలంగా లేకపోయినా, విధివిధానాల వెల్లడిలో జాప్యం జరిగినా శాసనసభ బడ్జెట్ సమావేశాలను అడ్డుకుంటామని కాంగ్రెసు నాయకులే హెచ్చరించడంతో ఆ అనుమానాలు బలవడుతున్నాయి. ముఖ్యమంత్రి రోశయ్య ప్రభుత్వం పక్షపాత వైఖరిని అవలంబిస్తోందని, బడ్జెట్ లో తెలంగాణకు అన్యాయం చేయబోతోందని కాంగ్రెసు నాయకులే విమర్శిస్తుండడం గమనార్హం. సీనియర్ కాంగ్రెసు శాసనసభ్యుడు ఆర్ దామోదర్ రెడ్డి రోశయ్యపై తీవ్రమైన వ్యాఖ్యలు చేస్తున్నారు. తెలంగాణకు రోశయ్య అన్యాయం చేస్తున్నారని ఆయన ధ్వజమెత్తుతున్నారు.

కాగా, కేంద్ర ప్రభుత్వం విధివిధానాలను ప్రకటించకపోతే రాజీనామాలు చేసి ప్రజల్లోకి వెళ్తామని తెలంగాణ రాష్ట్ర సమితి (తెరాస) నాయకులు అంటున్నారు. జస్టిస్ శ్రీకృష్ణ కమిటీ విధివిధానాలు తెలంగాణకు అనుకూలంగా ఉండాలని, దానికి నిర్దిష్ట కాలపరిమితి కూడా ఉండాలని తెరాస శాసనసభ్యుడు కెటి రామారావు అన్నారు. తాము తెలంగాణ జెఎసి నిర్ణయానికి కట్టుబడి ఉంటామని తెలుగుదేశం తెలంగాణ నాయకులు చెబుతున్నారు. కాగా, ఈ నెల 11వ తేదీన సారథ్య బృందాన్ని ఏర్పాటు చేయనున్నట్లు తెలంగాణ జెఎసి కన్వీనర్ కోదండరామ్ చెబుతున్నారు. ఆ తర్వాత తమ భవిష్యత్తు కార్యక్రమాన్ని రూపొందించుకుంటామని ఆయన అన్నారు. జస్టిస్ శ్రీకృష్ణ కమిటీ విధివిధానాలు తెలంగాణకు అనుకూలంగా ఉంటే సీమాంధ్ర సభ్యులు శాసనసభా సమావేశాలను నడవనిస్తారా అనేది కూడా సందేహంగానే ఉంది. బడ్జెట్ సమావేశాలు సోమవారం ప్రారంభమవుతున్నాయి. ఈ నెల 20వ తేదీన బడ్జెట్ ను ప్రతిపాదించాలని ముఖ్యమంత్రి రోశయ్య ఆలోచిస్తున్నారు. మొత్తం మీద, శాసనసభ బడ్జెట్ సమావేశాలపై నీలినీడలు అలుముకున్నాయి.